Архангай аймгийн Ус, цаг уур, орчны шинжилгээний төвөөс гаргасан мэдээллээр, тус аймагт тавдугаар сарын 4-ний өглөөний байдлаар зарим сумдаар цасгүй байсан ч ихэнх нутгаар 30 см хүртэлх зузаантай цасан бүрхэц тогтож, цаг агаар эрс хүйтэрч, хүнд нөхцөл байдал үүсээд байна.

Цас хамгийн их орсон сумдад үзэгдэх орчин хязгаарлагдаж, замын нөхцөл эрс муудсан тул Архангай аймгийн Засаг даргын шийдвэрээр тавдугаар сарын 4-ний 15:00 цагаас хойш бүх замын хөдөлгөөнийг тодорхойгүй хугацаагаар хаасан байна. Хот хоорондын авто замыг одоогоор нээгээгүй бөгөөд Цагаан даваа болон улсын чанартай замын цасыг цэвэрлэх, хусах ажлыг Онцгой байдлын болон холбогдох байгууллагууд шуурхай зохион байгуулж байна.

Өнөөдрийн байдлаар Өгийнуур, Өлзийт, Хайрхан, Хангай, Хашаат, Цэцэрлэг, Чулуут сумдын нутгаар цас ороогүй бол бусад сумдын нутгаар цас үргэлжилж байгаа аж.

Мөн цаг агаарын урьдчилсан төлөвөөр энэ сарын 6-нд зарим газар, 7-нд нийт нутгаар бороо, нойтон цас орж, салхи секундэд 12–14 метр хүрч ширүүсч, шороон шуурга шуурах төлөвтэй байгаа тул иргэд, малчид, тээвэрчдийг анхаарал болгоомжтой байхыг Архангай аймгийн УЦУОШТ-өөс анхааруулж байна.

Эх сурвалж: Архангай аймгийн Ус, цаг уур, орчны шинжилгээний төв