ОБЕГ-ын Гамшгаас хамгаалах сургалтын газар болон Гал түймэртэй тэмцэх газраас хамтран Өмнөд бүсийн Гал түймрийн улсын хяналтын байцаагч, ахлах байцаагч нарт зориулсан сургалтыг зохион байгууллаа.

Сургалтад Баянхонгор, Өмнөговь, Говьсүмбэр, Дорноговь, Дундговь, Өвөрхангай аймгийн Онцгой байдлын газрын нийт 30 орчим алба хаагч оролцсон бөгөөд тэд гал түймрийн хяналт, шалгалтын чадавхаа дээшлүүлэхэд чиглэсэн цогц мэдээлэл, дадлагын ажилд хамрагдлаа.

Сургалтын үеэр дараах сэдвүүдээр мэдээлэл өгсөн байна:

• Төрийн албан хаагчийн ёс зүй

• Хөдөлмөрийн аюулгүй байдал, эрүүл ахуйн шаардлага

• Цэргийн алба зохион байгуулалт

• Гал түймрийн улсын хяналт шалгалтын цахим бүртгэл, мэдээлэл

• Худалдаа, олон нийтийн болон өндөр барилга байгууламжийг ашиглалтад оруулах үед анхаарах асуудлууд

Мөн сургалтын онцлох хэсэг нь газрын тосны бүтээгдэхүүний агуулах, шатахуун түгээх станцын барилга байгууламжид газар дээр нь хяналт шалгалт зохион байгуулсан явдал байлаа. Үүгээр дамжуулан оролцогч байцаагчид харилцан туршлага солилцож, ажил мэргэжлийн ур чадвараа дээшлүүлсэн байна.

Ийнхүү бүсчилсэн сургалтаар дамжуулан орон нутгийн хяналтын алба хаагчдын мэдлэг, ур чадварыг ахиулж, гамшгаас урьдчилан сэргийлэх чадавхыг бэхжүүлж буй нь энэ удаагийн сургалтын гол ач холбогдол боллоо.

Эх сурвалж: Онцгой байдлын ерөнхий газар