Сэлэнгэ аймгийн Түшиг сумын Ар Шүрэн гэх газарт тавдугаар сарын 1-ний өдөр гарсан ой хээрийн түймрийн голомтод өнөөдрийн байдлаар нийт 324 хүн ажиллаж, түймрийг унтраах, хязгаарлах ажиллагааг эрчимтэй гүйцэтгэж байна. Түймрийн тархалтыг хязгаарлах зорилгоор бульдозероор зогон татах зэрэг шаардлагатай арга хэмжээнүүдийг авч байгаа юм.

Сумын Онцгой комисс тус бүс нутагт газар дээр нь ажиллаж буй бөгөөд Сэлэнгэ аймгийн Засаг дарга Н.Лхагвадорж Түшиг суманд ажиллаж, Онцгой комиссын хурлыг хуралдуулан нэмэлт үүрэг, чиглэл өгсөн байна.

Анхны дуудлага мэдээллийн дагуу 15 хүний бүрэлдэхүүнтэй баг ажиллаж эхэлсэн бол өнөөдрийн байдлаар дараах байгууллагуудын хүч нэмэгдүүлэн оролцож байна:

• ОБЕГ

• Үндэсний аврах бригад

• Орхон, Дархан-Уул, Өмнөговь, Дундговь, Говьсүмбэр аймгийн ОБГ

• Нийслэлийн ОБГ

• Сэлэнгэ аймгийн ОБГ-ын 6 дугаар анги

• Орон нутгийн 74 иргэн

Нийт 250 алба хаагч, 74 орон нутгийн иргэн хамтран ажиллаж байгаа бөгөөд үлээгч, хөрөө зэрэг шаардлагатай тоног төхөөрөмжийг аймгийн Засаг даргын зүгээс шуурхай олгожээ.

Түймрийн тархалтыг бууруулах, дахин сэдрэхээс сэргийлэх чиглэлд холбогдох алба, орон нутгийн удирдлага шуурхай зохион байгуулалттай ажиллаж байна.

Эх сурвалж: Сэлэнгэ аймгийн Онцгой байдлын газар, аймгийн ЗДТГ