Өнөөдөр Хавдар судлалын үндэсний төв (ХСҮТ)-д Эрүүл мэндийн яамнаас томилогдсон ажлын хэсэг ажиллаж, тус төвийн ерөнхий захирлын үүргийг гүйцэтгэгчээр ажиллаж байсан Н.Эрдэнэхүүг сайдын тушаалаар үүрэгт ажлаас нь чөлөөлсөн тухай албан мэдээллийг ирүүлжээ. Үүнийг дагалдуулан хэвлэлийн бага хурал хийж, Эрдэнэхүү өөрийн байр сууриа олон нийтэд илэрхийллээ.

Н.Эрдэнэхүү:

-"Чөлөөлөх тушаалд ямар нэгэн сахилгын шийтгэл, алдаа зөрчил, хуулийн тодорхой үндэслэл дурдагдаагүй, зөвхөн Хөдөлмөрийн тухай хуулийн ерөнхий заалтыг барьж, гэнэтийн байдлаар ажлаас чөлөөлж буйг онцолсон юм. Хуулиар бол нэг сарын өмнө мэдэгдэж, тодорхой үндэслэл бүхий тайлбар өгөх ёстой ч энэ шаардлагыг зөрчиж байна гэж үзэж байна.

Эрүүл мэндийн сайд Т.Мөнхсайхан ажилд томилогдсоноос хойш дарамт шахалт нэмэгдсэн. Ялангуяа шинэ эм нэвтрүүлэхтэй холбоотой 500 сая төгрөгийн татвар төлөх шаардлага тавигдсан ч уг гэрээнд гарын үсэг зураагүй, төсөвт тусгагдаагүй, хуулийн үндэслэлгүй тул төлбөрийн шилжүүлгийг хийх боломжгүй хэмээн татгалзсан нь дарамтлах шалтгаан болсон байж болзошгүй.

Манай төв зөвхөн хэрэгцээт тоног төхөөрөмжийн жагсаалтыг гаргаж өгсөн, худалдан авалт нь Төрийн худалдан авах ажиллагааны газар болон ЭМЯ-ны хариуцлагын хүрээнд явагддаг. Гэтэл энэ бүхэн миний ажлаас чөлөөлөгдөх шалтгаан болж буй мэт харагдаж байна. Ажил хийдэг хүмүүсийг дэмжих ёстой, цүнх барьсан хүмүүсийг дэвшүүлдэг тогтолцооны үр дүн ийнхүү гарч байна" гэв. 

Эцэст нь ХСҮТ-ийн хамт олон болон орон нутагт ажиллаж буй эмч, эмнэлгийн ажилтнуудад талархал илэрхийлж, хамтран ажилласан бүх хүмүүстээ баяр хүргэн, ажлаа хүлээлгэн өгч байгаагаа мэдэгдэв.

Эх сурвалж: ХСҮТ