Төв аймаг хот хоорондын зорчигч тээврийн үйлчилгээг тогтворжуулах, иргэдэд хялбар, ил тод үйлчилгээг хүргэх зорилгоор нийтийн тээвэр болон захиалгат үйлчилгээний аппликэйшн хөгжүүлэхээр төлөвлөжээ.

Өнөөдрийн байдлаар Зуунмод сум болон Улаанбаатар хотын хооронд 20 гаруй тээврийн хэрэгсэл өдөр бүр үйлчилж байгаа ч тээвэрлэлтийн үйл ажиллагаа тогтворгүй, иргэдэд бухимдал үүсгэдэг хэвээр байна.

Төв аймгийн Автотээврийн газрын дарга Н.Аасүрэн “Чандмань хурд”, “Алтан жолоо найзуудын зам” зэрэг хоёр хоршооны хооронд үл ойлголцол байсаар байгаа нь ачаа тээшийн үнэ, үйлчилгээний цагийн хувиар зөрөхөд хүргэж, иргэдийн итгэл алдарч буйг дурдсан юм. Мөн тээвэрлэлтийн чиглэлд нийслэлийн төв рүү орох боломж байсаар атал зөвшөөрөлгүй тул иргэдэд буруу ойлголт төрүүлж байгааг онцлов.

Төв аймгийн Засаг дарга Л.Төмөрчөдөр дараах шийдвэрүүдийг танилцууллаа:

• Хот хоорондын үйлчилгээ үзүүлэгч таксинуудыг хаягжуулж, стикертэй болгох

• Жолооч нарыг нэгдсэн хүрэмтэй болгох

• Камерын нэгдсэн систем нэвтрүүлж, хулгайн тээврийг зогсоох

• Жолооч нарт сургалт зохион байгуулах

• Үйлчилгээний соёл, харилцааны чадварыг сайжруулах

• Ачаа тээш, дайврын үнийг нэг стандартад оруулах

Дээрх шийдвэрийн хэрэгжилтийг тавдугаар сарын 15-нд хянах бөгөөд шаардлага биелүүлээгүй, эсэргүүцэл үзүүлсэн жолооч нарт түтгэлзүүлэх хүртэл арга хэмжээ авахаар болжээ.

Энэ шинэчлэлийн хүрээнд нэвтрүүлэх аппликэйшн нь зорчигчдод бодит цагийн мэдээлэл, захиалга, үйлчилгээний үнэн зөв мэдээллийг хүргэх зорилготой бөгөөд хөдөө-нийслэл чиглэлийн тээврийн ил тод байдлыг хангах шинэ арга хэмжээ болж байна.

Эх сурвалж: Автотээврийн газар