2025 оны дөрөвдүгээр сарын байдлаар 19,477 хүн шинээр жолооч болсон бол 13,284 иргэн жолоодлогын ангиллаа ахиулсан байна. Гэвч энэ тооноос илүү анхаарах зүйл бол чанаргүй сургалттай авто сургуулиуд зам тээврийн ослын шууд болон шууд бус шалтгаан болж байгаа явдал юм.

Жилд 190 мянга орчим хүн жолооч болохоор шалгалт өгдөг ч тэдний 50 хувь орчим нь л эрх авдаг. 2024 онд гэхэд 630 гаруй хүн зам тээврийн ослоор амь насаа алдсан нь өдөрт дунджаар хоёр хүний амь нас эндэж байна гэсэн үг юм. Тэдгээрийн дунд туршлагагүй, хангалттай сургалтад хамрагдаагүй шинэ жолооч нарын оролцоотой осол цөөнгүй бүртгэгддэг байна.

Сургалтын системийн доголдол:

• Зарим сургуулиуд дром (дадлагын талбай) байхгүй

• Мэргэжлийн багш, инженерийн хомсдол

• Суралцагчийг техник ашиглалгүй шалгалтад заавар чиглэл өгдөг

• Б ангиллын сургалттай байж бусад ангиллаар элсэлт авч сурталчилгаа хийдэг

• Шалгалт өгч, шууд үнэмлэх гаргуулах “зохион байгуулалттай схемүүд” байгаа тухай яриа газар авсан

Зарим иргэд "танил хүнээр дамжуулан", "бэлэн мөнгө төлөөд", ганц удаа хичээлд суусны дараа хуурамч нөхцөлөөр үнэмлэх гаргуулах боломжтой тухай ярьж, энэ тогтолцоо жолооны сургалтыг итгэл алдсан, худалдаа арилжааны түвшинд хүргэж байгааг анхааруулж байна.

Нийслэлд 250 гаруй, оронд нутагт 202 авто сургууль үйл ажиллагаа явуулж, нийтдээ 2500 гаруй багш ажиллаж байна. Гэвч эдгээр байгууллагуудад хяналт, стандартын хэрэгжилт сул байна. Жолооч бэлтгэх стандарт есөн жилийн өмнө батлагдсан ч өнөөдрийг хүртэл бүрэн хэрэгжиж чадахгүй байгаа нь дээрх байдлыг улам хүндрүүлж байна.

Салбарын мэргэжилтнүүдийн зүгээс дараах санал, шаардлагыг тавьж байна:

• Авто сургуулиудын хүний нөөц, материаллаг баазыг шалгаж, чанарын шалгуур нэвтрүүлэх

• Жолооч бэлтгэх сургалтын стандарт, хяналтыг шинэчлэх

• Үнэмлэх гаргалтад транспарент, хөндлөнгийн шалгалтын механизм нэвтрүүлэх

• Хөдөө орон нутгийн ослын нөхцөл байдалд тохирсон сургалт, дадлага бий болгох

Замын хөдөлгөөний аюулгүй байдал зөвхөн торгуулиар биш, бэлтгэлтэй, хариуцлагатай жолооч бэлтгэх тогтолцоогоор хамгаалагдах ёстойг энэ асуудал харуулж байна.

Эх сурвалжууд: Замын цагдаагийн газар