2025 оны эхний улирлын байдлаар барилгын салбарт 12 мянга гаруй ажиллах хүчний эрэлт бий болсон нь нийт ажлын байрны зарын 15 орчим хувийг эзэлж байна. Тус салбарт тусгай мэргэжил боловсрол шаардахгүй туслах ажилтны эрэлт ч өндөр байгаа бөгөөд энэ нь улирлын чанартай, тогтворгүй ажлын байрны нөхцөлтэй шууд холбоотой ажээ.

Zangia.mn болон unegui.mn зэрэг ажлын байрны томоохон цахим платформуудад хамгийн их нийтлэгддэг заруудын дунд барилгын инженер, туслах ажилтан, дотор засалчин, арматурчин, өрлөгчин, шаварчин зэрэг мэргэжлүүд багтаж байна.

• Барилгын инженерийн дундаж цалин: 3–5 сая төгрөг

• Барилгын туслах ажилтны өдрийн цалин: 60,000–80,000 төгрөг

Идэвхтэй байршуулсан нийт ажлын байрны зарын 8–15 хувийг барилгын салбарын зар бүрдүүлж байгаа бөгөөд оргил үедээ сард 3000 орчим шинэ ажлын байр зарлагддаг байна. 2025 оны эхний улиралд барилгын салбарын ажлын байрны зарын тоо өнгөрсөн оны мөн үетэй харьцуулахад 20–25 хувиар өссөн байна.

Судалгаагаар ажил олгогчдын 78.2% нь ажил горилогч ур чадварын хувьд шаардлага хангахгүй, эсвэл санал болгосон нөхцлөөс илүү цалин шаарддаг нь гол хүндрэл болдог гэжээ. Харин ажил горилогчдын зүгээс ажлын нөхцөл хүнд, тогтворгүй, улирлын чанартай байдаг нь ажлын байранд суурьшихгүй байх шалтгаан болдог байна.

Цаашид анхаарах асуудлууд:

• ААН-үүдийн ажлын байрны үнэлгээг олон улсын түвшинд хүргэх

• Зах зээлд өрсөлдөхүйц цалин хөлсний тогтвортой систем бий болгох

• Барилгын салбарыг сурталчлан таниулах

• Мэргэжлийн сургалт, их, дээд сургуулийн элсэлтийн тоог нэмэгдүүлэх

Салбарын мэргэжилтнүүдийн үзэж буйгаар дээрх алхмуудыг хэрэгжүүлснээр барилгын салбар дахь ажиллах хүчний хомсдол, ур чадварын зөрүүг бодитоор бууруулах боломжтой гэж байна.