Цахим гэмт хэрэгтэй тэмцэх хүрээнд хуулийн байгууллагууд иргэн Б.П-ийн үйлдлийг илрүүлэн мөрдөн шалгаж байна. Тэрбээр “Nary Narut, Shimer shimka, Suki Nay, Anujin, Marlaa Marlaa, kimmyya InkIop” зэрэг нэр бүхий хуурамч фэйсбүүк хаяг ашиглаж, “Токи.мн”, “Ленд.мнь”, “Hipay” зэрэг зээлийн аппликейшн дээр “эрх нэмэгдүүлнэ” гэсэн агуулгатай зар тараан иргэдийн итгэлийг олж, тэдний нэвтрэх нэр, нууц үгийг хууль бусаар авчээ.

Тэрээр энэ мэдээллийг ашиглан иргэдийн цахим данс, мэдээллийн сүлжээнд зөвшөөрөлгүй нэвтэрч, олон удаагийн үйлдлээр зээлийн үйлчилгээ авч, бусдын нэр дээр зээл гаргуулан мөнгө залилж, хулгайлах гэмт хэргийг удаа дараа үйлдсэн байна. Үүний улмаас их хэмжээний мөнгөн хохирол учруулж, хууль бус аргаар орлого олж, амьдралын эх үүсвэрээ болгосон байж болзошгүй нөхцөл байдал тогтоогдсон байна.

Одоогоор уг хэрэгт мөрдөн шалгах ажиллагаа үргэлжилж, холбогдох байгууллагууд нотлох баримт цуглуулан ажиллаж байгаа бөгөөд иргэдийг цахим орчинд хувийн мэдээллээ хамгаалж, танихгүй этгээдэд нууц үг, нэвтрэх нэрээ дамжуулахгүй байхыг анхааруулж байна.

Эх сурвалж: Цагдаагийн ерөнхий газар