Өнгөрөгч сард Үндсэн хуулийн цэцийн гишүүн Г.Баясгалангийн ажлын байрандаа архдан согтуурсан бичлэг олон нийтийн сүлжээнд тавигдсан билээ. Г.Баясгалангийн тухайд Д.Ганзоригийн оронд Үндсэн хуулийн цэцийн гишүүнээр томилогдсон, томилогдохоосоо өмнө Засгийн газрын хэрэг эрхлэх газрын тэргүүн дэд дарга, Хууль зүйн яамны Төрийн нарийн бичгийн дарга зэрэг албан тушаалыг хашиж байсан.
Ажлын байрандаа архидан, согтуурсан бичлэг нь цацагдсаны дараа уг үйлдэлд хариуцлага ёстой гэдэг байр суурийг иргэдийн зүгээр илэрхийлсэн боловч ҮХЦ-ийн зүгээс ямар нэг хариулт, тайлбар, няцаалт хийлгүйөнөөдрийг хүрсэн билээ.
Тэгвэл өнөөдөр УИХ-ын чуулганы нэгдсэн хуралдаанаар Үндсэн хуулийн цэцийн тухай хуулийн шинэчилсэн найруулгын төслийг хэлэлцэх үеэр энэ сэдэв дахин хөндөгдлөө.
Тухайлбал, УИХ-ын гишүүн Ц.Сандаг-Очир:
-Хуулийн төслийн 19.2-д Цэцийн гишүүн төрийн албаны, авлигын тухай, нийтийн албанд нийтийн ашиг сонирхлоос сэргийлэх тухай хуулийн холбогдох үүрэг хязгаарыг дагаж мөрдөнө гэж заасан. Ер нь Цэцийн гишүүн бүх хуулийг дагаж мөрдөх ёстой. Энэ гурван хуулийг заавал тодорхойлж байгаа нь ямар учиртай вэ?
21.1-д Цэцийн дарга, гишүүн хууль зөрчвөл түүнийг эгүүлэн татах үндэслэл болно гэж заасан. Цэцийн гишүүн эрүү, авлигын хэрэгт холбогдоод явах нь ховор. Харин жил дараалан Цэцийн гишүүдийн ёс зүйгүй үйлдлүүд гарч байгаа. Өмнө Цэцийн гишүүн онгоцонд ямар асуудал үүсгэлээ. Саяхан хүртэл ажлын байранд архи дарс хэрэглээд явж байна. Энэ бол төрийн өндөр албан тушаалтнуудын ёс зүйн асуудал. Цэцийн гишүүд ёс зүйн асуудал, зөрчил дутагдвал гаргавал яах вэ. Энэ нь авлига, эрүүгийн асуудалд холбогдсоноос илүү иргэдийн бухимдал хүргэж байна.
УИХ-ын гишүүн Ц.Мөнх-Оргил:
-19.2 нь Цэцийн гишүүний хувьд онцгой анхааруулж буй заалт. Иргэний хүний хувьд бүх төрлийн хуулиа дагана. Ёс зүйн хариуцлагын хувьд нийт төрийн албаны тухай хуулиар явна. Төрийн албан зөвлөлийн ёс зүйн хороонд захирагдаж, сахилга шийтгэл онооно.
Үүнд нэг асуудал байна. Цэцийн гишүүнд хариуцлага тооцох нэрийдлээр гаргаж буй шийдвэрт нь нөлөөлөх бололцоо байгаа.
