УИХ-ын сонгууль ойртох тусам олонхи гишүүдийн хувьд сонгуульд нэр дэвших, цаашлаад сонгогчдоос оноо авахын тулд  нүдээ ухаад өгөхөөс буцахгүй болсон бол зарим нэг гишүүдийн хувьд эсрэгээрээ "орой нь цоорч" эхлэв. Гэнэт ухаан цоорсон тэдгээр хүмүүсийн тоонд УИХ-ын гишүүн Г.Дамдинням багтаж байна.

Эрхэм гишүүн өнөөдөр малчдын амьжиргааг дээшлүүлэх, махны экспортыг нэмэгдүүлэх талаар өөрийн байр суурийг илэрхийлэхдээ "Ган, зуд, зовлонгоор улс төрийн оноо хийх гэж малчдад тусламж үзүүлэх дүрээр хэдэн шуудай тэжээл, хивэг, өвс тараагаад явах нь УИХ-ын гишүүний ажил биш шүү дээ. Харин малчдын мал, мах, малын түүхий эдийг нь экспортод гаргах үүд хаалгыг нээх бодлогын өөрчлөлт, хууль эрх зүйн орчныг санаачлан батлуулах нь УИХ-ын гишүүд бидний ажил юм" гэв.

Гэвч чуулганы индэр дээрээс хааяа нэг унадаг "тэнэсэн сум" мэт энэ үгийг хэлсэн анхны хүн Г.Дамдинням биш. Мөн сүүлчийнх нь ч биш нь ойлгомжтой. Сонгууль  ойртохоор хаа нэг сонсогдож, хаданд цуурайтаад өнгөрдөг энэ суу ухаан сонгуулийн дараа ажил болдоггүй нь харин гачлантай. Ялангуяа эрх баригч намын хувьд. Сая болж өнгөрсөн зуднаар хэн хамгийн их өвс, тэжээл, хивэг зөөсөн билээ. Зудад явсан Онцгойгийн алба хаагчид, ачаа тээврийн машинаас олон УИХ-ын гишүүд, сайд дарга нарын америк, япон жийпний цуваа малчдын хотонд хүрснийг бид энэ хоёр циймрээрээ харсан даа. 

Гэхдээ тэдгээр нөхөд малчин ард, нүүдэлчин ахуйд хайртайдаа биш юм. Харин малчин өрхийг (тэдгээр нь хүн амын цөөнх байх нь үүнд огт хамаагүй) төлөөлдөг гишүүдийн тоо манай парламентад зонхилдог учраас тэр. Хоёрдугаарт, малчдын амьдрал эгэл боргил, төр засгаас нэг их хамааралгүй, жалга жалгандаа дов довоо борлуулаад явдаг учраас улстөрчдөөс учиргүй их зүйл нэхээд байдаггүй мөлх цөлх улс. Жилдээ нэг удаа очоод, дээлийн торго, дугуй булантай цай энэ тэрхэнээр гарыг нь тэнийлгээд, Монгол Улс хэрхэн мандан бадарч, цэцэглэн хөгжиж, үүний төлөө өөрсдөө хэрхэн чөмгөө дундартал зүтгэж байгаа тухай хоолой зангируулаад ярихад л "конец фильма". Илүү дутуу бодлого бодож, тархиа гашилгах шаардлага ч байхгүй.

Тиймээс Г.Дамдинням гишүүн хэрвээ Дархан-Уул аймгаас биш, Ховдын Манхан сумаас сонгогдсон бол өнөөдрийнх шиг ийм "болчимгүй" үг унагаж амны алдас болохгүй, хамгийн түрүүнд тавхай нь гялалзаад алга болох байсан биз. Улс төр хийнэ ээ гэдэг чинь...