УИХ-ын чуулганы өнөөдрийн хуралдаанаар Аймаг, нийслэл, сум, дүүргийн ИТХ-ын 2024 оны ээлжит сонгуулийг товлон зарлах, санал авах өдрийг тогтоох тухай асуудлыг хэлэлцэж байна. Хэлэлцүүлгийн үеэр орон нутгийн сонгуулийг баасан гаригт явуулах нь зөв, буруу" гэдэг сэдвээр гишүүдийн дунд "жижигхэн" маргаан дэгдэв.  

УИХ-ын гишүүн Ц.Туваан: 

-Орон нутгийн сонгуулийн санал авах өдрөө энэ удаагийнх дээр лхагва гаригт зохион байгуулах хэрэгтэй. Намар нүүдэл суудлын үеэр сонгуулийн ирц маш багасдаг. Дахиад баасан гаригт хийвэл залуучууд оролцохгүй. 

УИХ-ын гишүүн Н.Энхболд: 

-Сонгуулийн тухай хуульд орсон нэмэлт өөрчлөлттэй холбогдуулан орон нутгийн тухай хуулийн төслийг УИХ-аар хэлэлцүүлсэн. Бүх шатанд хэлэлцэгдээд хамгийн сүүлд алх цохих асуудал үлдсэн байсан. Гэвч ирц хүрээгүй учраас хууль батлагдаагүй. Энэ хуульд зургаан сарын дотор өөрчлөлт оруулж болохгүй гэсэн заалт байсан. Энэ удаагийн орон нутгийн сонгуулийг аравдугаар сарын 11-ний баасан гаригт зохион байгуулахаар байнгын хорооноос санал болгосон. Өмнөх орон нутгийн сонгууль ч мөн адил баасан гаригт болж байсан. 

Тав дахь өдөр болохоор залуучууд сонгуульд оролцохгүй юм шиг дахин дахин яриад байна. Ийм зүйлд уриалаад байгаа юм шиг сонсогдож байна. Үүнийхээ оронд иргэд төрийн сонгуульдаа идэвхтэй оролцох ёстой гэж ярих хэрэгтэй. Ялангуяа залуучууд сонгуульдаа идэвхтэй оролцох байх.