Ардчилсан Эмэгтэйчүүдийн Холбооноос өчигдөр нийслэлийн төв талбайд тайван жагсаал зохион байгууллаа. 

Жагсаалд ирсэн иргэд эмэгтэйчүүдийн эдийн засгийн эрх чөлөөг дэмжих, ажлын байрны дарамтыг устгах, баталгаат ажлын байруудыг бий болгох зэрэг асуудалд эрх баригчид, төр засгийн удирдлагууд анхаарахлаа хандуулахыг хүсч, үзэл бодлоо илэрхийллээ.

АЭХ-ны тэргүүн Б.Жаргалан: 

-Өнөөдөр баярын өдөр гэхээс илүү тэмцлийн өдөр байсаар ирсэн. Ардчилсан Нам(АН) ямагт эмэгтэйчүүдийн болон нийгмийн асуудалд дуу хоолойгоо хүчтэй илэрхийлдэг.

34 жилийн өмнөх энэ өдөр Ардчилсан хувьсгалын улс төрийн өлсгөлөн хамгийн хурц хэлбэртээ шилжсэн байдаг. Улмаар 1990 оны гуравдугаар сарын 9-ний өдөр тухайн үеийн МАХН-ын Улс төрийн товчоо бүрэн бүрэлдэхүүнээрээ огцорсон юм.

"Март 8" бол Ардчилсан хувьсгалтай холбогддог, АН-ын түүхэнд тод тэмдэглэгдсэн. 34 жилийн өмнө бид улс төрийн эрх чөлөөг түлхүү ярьж байсан бол энэ удаад эдийн засгийн эрх чөлөө, тэр дундаа эмэгтэйчүүдийн эдийн засгийн эрх чөлөө хэрхэн боомилогдож байгаад иргэдийн анхаарлыг татахыг зорьж байна. Учир нь өнөөдрийн байдлаар хөдөлмөрийн насны хоёр эмэгтэй тутмын нэг нь л албан ёсны баталгаат хөдөлмөр эрхэлж байна. Эмэгтэйчүүдийн эдийн засгийн эрх чөлөө боомилогдсоноор улс төрийн оролцоо, нийгэмд эзлэх байр суурь муудна. Иймд энэ асуудлыг анхаарч, төр засаг, эрх баригч нарт дуу хоолойгоо хүргэх нь зүйтэй гэж үзэж байна.

АН-ын Нарийн бичгийн дарга С.Цэнгүүн: 

-"Эрх чөлөөний өдрүүд бол маш чухал гэж бодож энэхүү арга хэмжээнд ирлээ. Эрэгтэй ч бай, эмэгтэй ч бай иргэний хүнийхээ хувьд нийгэмд идэвхтэй оролцоотой байх хэрэгтэй гэж боддог. Хүйсээр ялгаварлах шаардлагагүй. Миний бодлоор иргэд юуны эсрэг тэмцэж байгаа вэ гэдгээ сайн бодох ёстой. Хувь хүн рүү дайраад амжилт олохоо больсон. Одоо тогтчихсон байгаа, ямар ч хүн очоод өөрчилж чадахгүй байгаа тэр тогтолцоонд анхаарах ёстой.

Гэрэл зургийг MPA агентлаг