Хууль зүйн сайд асан Х.Тэмүүжин өнөөдрийн эрх баригчид, Засгийн газар зохиомол албан тушаал бий болгож, авлига хулгайг буух эзэнгүй болгож байгаа талаар байр сууриа илэрхийлжээ.

Тэрээр "Түгжрэлийн сайд гэдэг албан тушаал дэлхийд хаана байгаа юм бэ? Нэг хүнд зориулаад, тодорхой бүлгийн таашаал авах гэдэг юм уу, бялуу хуваалцах тэр сэтгэл ханамжийн төлөө төрд "мухар олгой" үйлдвэрлэж байна. Энэ үр ашигтай нь мэдэгдэхгүй, хэрэгтэй хэрэггүй нь мэдэгдэхгүй, зорилго чиглэл нь ойлгомжгүй эрх мэдлийг үйлдвэрлэх гэдэг нь өөрөө авлигыг бий болгож байна. Хотын дарга, түгжрэлийн сайд эрх мэдэл зэргэцүүлж булаацалдсан ийм зохиомол эрх мэдэл нь эцсийн дүндээ ийм зүйлд хүрнэ гэдэг нь ойлгомжтой байсан.

Хотын дарга нь шийдэх гээд байгаа юм уу, эсвэл Түгжрэлийн сайд нь шийдэх гээд байгаа юм уу маш их хэмжээний мөнгийг тэнд тавиад, сүүлдээ юу болсон гэхээр аль аль нь би мэдээгүй ш дээ гэдэг халхавчилсан үгний дор ногоон автобусны хулгай гараад явчихаж байгаа юм. Тэгэхээр эрх мэдлийг зохиож болохгүй. Хэн нэгэн, тэр дундаа хувь хүнд зориулж албан тушаал үйлдвэрлэж болохгүй гэдгийг харуулж байгаа нэг том жишээ нь энэ.

Эрх мэдлийг төвлөрүүлэх, мөнгийг овоолох, юмыг нуух гэдэг гурван зүйл л авлигын тулгын гурван чулуу. Тэгэхээр ногоон автобус яг адилхан. Нуусан. Үндэсний аюулгүй байдал гэдэг нэрийн дор нуусан.

Хаалттайгаар бүх юмыг хийх гэж оролдоно гэдэг нь эцсийн дүндээ юу вэ гэхээр ард нь юу ч явж магадгүй гэдэг магадлалыг нэмчихэж байгаа юм" гэлээ.