Л.Оюун-Эрдэнийн Засгийн газрыг самарч мэдэх хоёр хэцүү зүйл өнгөрөгч долоо хоногт болов. Эхлээд Шадар сайд С.Амарсайханы эхнэр, МҮОНТВ-ийн нүүр царай болсон хөтлөгч Ч.Ичинхорлоо ХӨСҮТ-ийн улаан бүсээр зочилж, хиймороо сэргээгээд хоёр цагийн дараа юу ч болоогүй юм шиг бэлхүүсээ туялзуулан гарч одсон явдал олон нийтийг цочоосон билээ. Улаан бүс гэдэг нь коронавирусын халдвар авсан иргэдийн эмчлүүлж буй хориотой бус. Фэйсбүүк, твитрээр давалгаалаад эхлэнгүүт мисс бүсгүйн нөхөр, Шадар сайд С.Амарсайхан уг асуудлаар хэвлэлийн бага хурал зарлаж, "Миний бие улсын ажлын улмаас гэр бүлдээ анхаарах завгүй учир эхнэр маань ганцаараа улаан гараараа тэмцэж байна. Асаргаанд байдаг аав, ээж хоёр нь халдвар авсан учраас өөрийгөө эрсдэлд оруулан байж тийшээ орсон" хэмээн хамгаалжээ. "Бүх амьтад эрхтэй, гахай илүү эрхтэй", гэдэг" гэдэг шиг "Дарга эрхтэй, эхнэр илүү эрхтэй" болсон хэрэг. Манайхаас өөр оронд бол аль хэдийн уучлал гуйгаад ажлаа өгчихсөн.

Уг нь бол Ч.Ичинхорлоо гэдэг хувь хүн гэр бүлийнхээ төлөө, эцэг эхийнхээ төлөө сэтгэл чилээж, эрсдэл гаргасан нь үнэн бол түүнийгээ үүрсэн шиг үүрээд, эмнэлэг дотроо 14 хоногт тусгаарлагдах ёстой байлаа. Угаасаа ХӨСҮТ-ийн улаан бүс дотор мөрддөг дэглэм нь тийм. Ямар шалтгаанаар байх нь хамаагүй, зайлшгүй шаардлагатай байгаад тийшээ орсон л бол тэндээ 14 хоног тусгаарлагдах ёстой.

Харин нэвтрүүлэгч бүсгүй тэгээгүйг бодоход Шадар сайдын эхнэрийн эрх дархаар дотогш дайрч ороод, эмч сувилагч нарт нь баахан үүрэг даалгавар өгч, загнаж зандарч байгаад гарснаас зайлахгүй. Учир нь түүнийг ХӨСҮТ гар үед эмнэлгийн эмч, ажилтнууд "Ийм байдлаар гарч болохгүй, дэглэмийн дагуу тусгаарлах ёстой" гэдгийг сануулж хэлж, шаардсан авч нөгөөх нь "Танай энэ заваан эмнэлэгт чинь тусгаарлагдахгүй" гэж баахан орилж хашгирч загнаад явсан сураг байна.

Сануулахад, өмнөх Ерөнхий сайд У.Хүрэлсүх ч мөн үүнтэй төстэй шалтгаанаар огцрох өргөдлөө өгч байлаа. Дөнгөж төрсөн нярайг эхтэй нь хамт ХӨСҮТ рүү зөөвөрлөхдөө гадуур хувцсыг нь өмсүүлэлгүй, эмнэлгийн халат, шаахайтай авч явсан шалтгаанаар төрийн ордны өмнө иргэд жагсаж, Эрүүл мэндийн сайд, Онцгой комиссийн дарга нарыг огцруулахыг шаардсан авч Ерөнхий сайд нь өөрөө түрүүлээд буугаад явчихсан. Бүхэл бүтэн Засгийн газар солигдсон байдаг юм. 

Тийм болохоор У.Хүрэлсүх хариуцлага хүлээсэн газар С.Амарсайхан хариуцлага хүлээхгүй байж таарахгүй. Тэр тусмаа УОК, Шуурхай штабыг удирдаж, улс орон даяар дэглэм сахиулж байгаа Шадар сайд хүн цэвэр өөрийнх нь хариуцлагатай шууд холбоотой ийм асуудал дээр эхнэрээ эрхлүүлээд байж болохгүй. Эрхлүүлмээр байлаа ч ядаж түүндээ МУ-ын Шадар сайдын эрх мэдлийг ашиглажх ёсгүй.

Хэрвээ жишээ нь жирийн иргэд ингэж авирласан бол өнөөдөр яах байсан бэ? Зүгээр л халдвартай улсаас ирсэн учраас ХӨСҮТ-д тусгаарлагдсан иргэд тусгаарлалтын 21 хоногийг дуусгахын тулд нялх үртэйгээ уулзаж чадалгүй эмнэлэгт нас барж, аавынхаа оршуулганд орж чадалгүй нулимсаа асгаж суусан юм шүү. Тиймээс С.Амарсайханыг огцруулах иргэдийн шаардлага хамгийн зөв. С.Амарсайханы хувьд ч хэлсэн үгээ буцаах боломжгүй болсон. "Сум нэгэнт харвагдсан" гэдэг билүү. 

Тиймээс одоо Ерөнхий сайд нь түүнд хариуцлага тооцож явуулах уу, эсхүл өөрөө явах уу гэдэг л сонголт байна.

Б.ЗАЯА