Эрүүл мэндийн яамнаас коронавируст цар тахлын нөхцөл байдлын талаар болон дэлхийн улс орнуудад амьдарч буй монгол иргэдэд ямар зөвлөгөө, мэдээлэл өгч харилцан ажиллагааны талаар мэдээлэв. Мөн Монгол улсад долоо дахь удаагаа эрсдэлийн үнэлгээ хийжээ.
Эрүүл мэндийн яамны хэлтсийн дарга Д.Нарангэрэл:
-"Коронавируст халдвар дэлхийн 213 орон, бүс нутагт бүртгэгдэж, 2.2 сая гаруй хүн өвчилж, 154256 хүн нас бараад байна. Харин 500 мянга гаруй хүн эдгэж, 1.5 сая хүн эмнэлэгт эмчилгээ хийлгэж байна.
Өвчлөлийн тархалт АНУ, Итали, Иран, Испани, Их Британи, Турк улсуудад эрчтэй хэвээр байна.
ОХУ-д сүүлийн 24 цагт 4070 шинэ тохиолдол бүртгэгдэж, нийт 32 мянгыг даваад байна. Үүнээс 45 хувь нь Москва хотод байна. Өмнөх өдрөөсөө 43 хувиар нэмэгдлээ. Ирэх 2-3 долоо хоногт дэгдэлт оргилдоо хүрнэ гэж Москва хотын захирагч мэдэгдсэн.
Москва хотод анхны тохиолдол бүртгэгдсэнээс хойш дөрвөн сарын хугацаанд 1.7 сая хүнд шинжилгээ хийсэн ч найдвартай байдалд нь эргэлзэж байна. Мөн өвчлөл эхэлж байх үед 20-30 хувь нь хөнгөн буюу балархай байсан бол одоо 50 хувьд нь шинж тэмдэггүй хэлбэрээр илэрч байна.
Нэгдүгээр сарын 30-наас хойш Эрүүл мэндийн яамнаас 323002 утсыг 24 цагаар ажиллуулж, мэргэжлийн эмч нар зөвлөгөө, мэдээлэл өгч байна. Энэ хугацаанд дэлхийн 17 улсаас 96 монгол хүн холбогдож зөвлөгөө авлаа.
Тодруулбал;
-
Ирланд улсад 4
-
ОХУ-д 3
-
Шведэд 2
-
Швейцарт 2
-
БНСУ-д 2 монгол хүний лабораторийн шинжилгээ хариу ЭЕРЭГ гарсан, гэртээ тусгаарлагдаж байна. ЭМЯ-наас байнга зөвөлгөө өгч байгаа.
Халдвар авсан иргэдийн дийлэнх нь оюутан байна. Эдгээр иргэд гэртээ тусгаарлагдаж байгаа бөгөөд яамны дээрх утсанд холбогдож ямар хоол хүнс хэрэглэх, гэрээ хэрхэн ариутгах, гэрийн нөхцөлд эмчлэх тухай зөвлөгөө гэх мэт мэдээлэл авч байна. Мөн эцэг эхүүд нь холбогдож зөвөлгөө авч байна" гэв.
Монгол улсад шинэ коронавирусийн халдвар тархах эрсдлийн үнэлгээг долоо дахь удаагаа хийхэд халдвар тархах эрсдэл МАШ ӨНДӨР хэвээр гарчээ.
