Ираны алдарт бөх Саид Моллаид иргэншлээ сольж, Монгол Улсын нэрийн өмнөөс барилдахаар болсон тухай бид мэдээлсэн. 

Тэгвэл Саид Моллаид нь Монгол Улсын иргэн болох хүсэлтээ Гадаадын иргэн харьяатын газарт ирүүлж, түүний хүсэлтийг албан ёсоор хүлээн авчээ. 

Хуулийн дагуу уг хүсэлтийг Ерөнхийлөгчийн Тамгын газарт хүргүүлснээр Саид Моллаид Монгол Улсын иргэншил олгох Ерөнхийлөгчийн зарлиг 2019 оны 11 дүгээр сарын 20-нд гарсан байна. Ийнхүү тэрээр Монгол Улсын иргэн болжээ. 

Саид Моллаид хүсэлтдээ: Монгол Улсын иргэн болох, жүдо бөхөөр Монгол Улсын нэр дээр барилдах чин эрмэлзэлтэй байгаагаа дурдсан байна.

Монгол улсын Ерөнхийлөгч Х.Баттулгын зарлигт: "Монгол Улсын Үндсэн хуулийн Гучин гуравдугаар зүйлийн 1 дэх хэсгийн 9 дэх заалт, Харьяатын тухай хуулийн 19 дүгээр зүйлийн 1, 24 дүгээр зүйлийн 1 дэх хэсэг, өөрийнх нь хүсэлт, Гадаадын иргэн харьяатын газрын дүгнэлтийг тус тус үндэслэн Монгол Улсын Ерөнхийлөгч Х.Баттулга  2019 оны 11 дүгээр сарын 20-ны өдөр “Монгол Улсын харьяат болгох тухай” зарлиг гаргаж, Саид Моллаидийг Монгол харьяат болгов" гэжээ. 

Саид Моллаид нь 1992 онд төрсөн, 2017 онд Будапештэд болсон жүдо бөхийн ДАШТ-ээс алт, хүрэл, 2015, 2016 онд Азийн наадмаас хүрэл, 2017 онд Азийн АШТ-ээс мөнгөн медаль хүртсэн тамирчин юм.

Дашрамд дурдахад, Манай улс Исламын Бүгд Найрамдах Иран Улстай 1971 онд диполмат харилцаа тогтоосон байдаг.