Монгол Улс Цөлжилттэй тэмцэх тухай НҮБ-ын Конвенцын Талуудын 17 дугаар бага хурал буюу СОР17-г Улаанбаатар хотноо зохион байгуулахад хоёр долоо хоног үлдлээ.

“Эх байгалиа сэргээе, Итгэл найдвараа бадраая” уриан дор энэ сарын 17-28-нд болох хуралд дэлхийн 190 гаруй орны таван мянга орчим төлөөлөгч хүрэлцэн ирж, цөлжилт, газрын доройтол, ган, бэлчээр зэрэг хүн төрөлхтний өмнө тулгамдаж буй байгаль орчны сорилт, тэдгээрийг шийдэх, давж гарах арга замыг хэлэлцэнэ.

Монгол бол уур амьсгалын өөрчлөлтөд маш эмзэг экосистемтэй, газар нутгийнх нь 77 орчим хувь нь доройтсон гэж үнэлэгджээ. Цөлжилт, газрын доройтол, ган, зуд зэрэг үзэгдэл ихэссээр байгаа нь мал аж ахуй, хүнсний аюулгүй байдалд шууд нөлөөлдөг. Ийм бэрхшээл тулгарч буй оронд СОР хурлыг зохион байгуулах нь дэлхийн анхаарлыг  бодит нөхцөл байдалд төвлөрүүлж, асуудлыг газар дээр нь шийдэх боломж бүрдүүлдэг. Учир нь цөлжилт, газрын доройтол, гангийн эсрэг хөрөнгө оруулалтыг нэмэх, шинжлэх ухаан, бодлого, санхүүжилтийг холбосноор үр дүнд хүрэх зорилго агуулдаг.

Засгийн газар энэ хуралд “Тал хээрийн төлөвлөгөө” бодлогын баримт бичгээ танилцуулна. Энэ нь бэлчээр, ус ба газрын нэгдсэн менежмент, байгальд суурилсан шийдэл бүхий тогтвортой дэд бүтэц гэсэн агуулгатай. Бэлчээр нь зөвхөн мал бэлчдэг газар бус өндөр уул, ойн сангаас бусад бүх газрыг хамруулдаг. Монгол орны газар нутгийн 80 хувь бэлчээрийн ангилалд багтдаг. Газрын гадарга их халснаар ургамлын нэр төрөл, тоо цөөрч, газар хөрсгүй болж, цөлжиж доройтон ган нүүрлэдэг. Иймд бэлчээр буюу хуурай газрыг хамгаалах нь нэн чухал болоод байгаа. Бэлчээрийн мал аж ахуй эрхэлдэг нүүдэлчдийн онцлогтой манай оронд газар нутаг эрчимтэй цөлжиж байгаа тул тулгамдсан асуудлыг бодит байдалд нь хэлэлцэх хэрэгцээ, монголын идэвхтэй санал, оролцоог нэг дор харуулж чадах стратегийн байршил учир сонгожээ.

“Хурлын үр дүнд олон улсын сан, хөтөлбөрөөс манай улсад шаардлагатай санхүүжилт, дараагийн 10 жилд төсөл хэрэгжүүлэх, цөлжилттэй тэмцэх сайн туршлага, шинэ санаачилга нэвтрүүлэх, цаашид хийх ажил, хөрөнгө оруулалт татах боломж бий болно” гэдгийг БОУАӨ-ийн сайд Ц.Сандаг-Очир онцолсон.

Мөн манай улс доройтсон газраа нөхөн сэргээхэд ахиц гаргах, ган, усны хомсдол, гангийн эрсдэлийг урьдчилан тооцох систем, усны нөөцийг илүү ухаалаг ашиглах, бэлчээр, нүүдлийн мал аж ахуйн тогтвортой загвар, бэлчээрийн даац, ашиглалтын зөв менежмент хийхэд дэм болох юм. Шинжлэх ухаан, технологи, хиймэл дагуул, дата ашиглан газрын доройтол хэмжих, шинэ технологи нэвтрүүлэх, судалгаа, инновацын хамтын ажиллагаа сайжирна гэж найдаж байгаа. Түүнчлэн бэлчээр, ойжуулалт, усны төслөө санхүүжүүлэх боломж нэмэгдэхээс гадна зам, зочид буудал, хурлын байгууламж сайжирч, аялал жуулчлалд ч эерэг нөлөөлнө. Хурлын үеэр монголын уламжлалт мал аж ахуйг “тогтвортой загвар” болгон сурталчилснаар соёлын дипломат нөлөө нэмэгдэх, байгаль орчны бодлогоо ахиулах, гадаад дэмжлэг авах, дэлхийд нөлөөтэй байр суурь эзлэх стратегийн асар их боломж билээ.

НҮБ-ын Цөлжилттэй тэмцэх конвенц (UNCCD) нь 1994 онд байгуулагдсан, хүрээлэн буй орчныг тогтвортой газрын менежментийн хөгжилтэй холбосон хууль эрх зүйн үүргийг агуулсан олон улсын гэрээ, баримт бичиг бөгөөд конвенцод одоогоор 197 улс болон Европын холбоо нэгдээд байна. 

Талуудын 17-р бага хурал (COP17)-ын цахим хуудас: https://unccdcop17.org/

ЭХ БАЙГАЛИА СЭРГЭЭЕ

ИТГЭЛ НАЙДВАРАА БАДРААЯ