Дөрвөн жилийн өмнө Их Британийн зохиолч Салман Рушдигийн амь насанд халдсан Хади Матарыг олон улсын терроризм болон түүнтэй холбоотой хэд хэдэн гэмт хэрэгт буруутай хэмээн АНУ-ын Буффало хот дахь Холбооны шүүх үзжээ. Шүүгчид хоёр цагийн хугацаанд зөвлөлдсөний эцэст ийм шийдвэр гаргасан байна.

28 настай Х.Матар Ливанаас АНУ-д ирж суурьшсан гэр бүлд төрж өссөн бөгөөд Ливаны шийт шашинтнуудын “Хэзболла” бүлэглэлийн заавраар дээрх халдлагыг үйлдсэн бололтой. Тус бүлэглэл Ираны дээд удирдагч асан Рухолла Хомейнигийн үзэл санааг дагадаг бөгөөд тэрбээр 1988 онд “Сатаны шүлгүүд” романыг бичсэн С.Рушдиг хөнөөхийг уриалж байв.  

Х.Матар одоо Рушдигийн амь насанд халдсан хэргээр Нью-Йорк муж улсын шоронд 25 жилийн ял эдэлж байгаа бөгөөд түүнд бүх насаар нь хорих ял оноож магадгүй байна.   

Одоогоос дөрвөн жилийн өмнө буюу 2022 оны 8 дугаар сарын 12-нд Матар оюутнуудад лекц унших гэж байсан энэтхэг гаралтай Их Британийн зохиолч Салман Рушди руу хутга барин дайрчээ. Олон удаагийн шарх авсан Рушдигийн баруун нүд нь сохорсон байна.

Нью-Жерси муж улсад амьдардаг Х.Матар нэгэн хувцасны дэлгүүрт ажиллаж байсан бөгөөд түүний ээжийн ярьснаар, хүү нь 2018 онд Ойрх Дорнод руу яваад ирснийхээ дараа исламын шашныг ихэд сонирхож, бусдаас өөрийгөө тусгаарлах болжээ.

Өмнө нь болсон шүүх хурлын үеэр Матар мэдүүлэг өгөхдөө, “Сатаны шүлгүүд” романаас хэдхэн хуудсыг уншихад л Рушди исламын шашныг гутаан доромжилсон нь тодорхой болсон гэж байв. Уг ном 1989 онд хэвлэгдсэн нь исламын шашинтнуудын ширүүн эсэргүүцэлтэй тулгарч, их зөнч Мухаммедыг доромжлон гутаасан С.Рушдийг хөнөөхийг аятолла Хомейни уриалж байлаа.

Харин Рушди өөрийг нь буруутгаж буйг няцааж “энэ номын агуулгыг хүмүүс буруугаар ойлгожээ, энэ бол Лондон дахь Өмнөд Азийн цагаачдын тухай роман. Тэдний шүтдэг шашин бол энэхүү түүхийн ердөө нэг л хэсэг нь” гэж байв.