БНАСАУ-ын удирдагч Ким Жөн Ун өөрийн залгамжлагчаар охин Ким Жу Эг томилохоор төлөвлөж байгаа бөгөөд охиныхоо байр суурийг бэхжүүлэх алхмуудыг хийж байна гэж Reuters агентлаг Өмнөд Солонгосын Үндэсний тагнуулын албаны (NIS) мэдээллийг эш татан бичжээ.

Ким Жу Э ойрын үед болох Хөдөлмөрийн намын хуралд оролцохыг тус алба үгүйсгэсэнгүй. Тагнуулын байгууллагын дүгнэлтээр, тэрбээр уг хуралд оролцож байгаа нь, мөн танилцуулж байгаа арга хэлбэрүүд, мөн албан ёсны статус олгох магадлалтай байгаа нь түүнд эрх мэдлийг шилжүүлэн өгөхөөр төлөвлөж байгаа гэдгийг тодорхой хэмжээгээр баталж байгаа ажээ.

NIS-ийн хаалттай мэдээллийн дараа парламентын гишүүн Ли Сон Кун хэлэхдээ, Өмнөд Солонгосын тагнуулын байгууллага өмнө нь Ким Жу Эг нэр дэвшигчийн хувиар хэлэлцэж байсан бол одоо түүнийг залгамжлагчаар "томилох шатандаа явж байна" гэжээ.

Түүнийг эрх мэдлийг залгамжлахад бэлтгэж байгаа тухай Өмнөд Солонгосын тагнуулууд анх 2024 оны долоодугаар сарын 29-нд мэдээлж байжээ. Гэхдээ нөхцөл байдал өөрчлөгдөж, өөр нэр дэвшигч сонгогдох магадлалтайг онцолж байв.

Ким Жу Э эцгийнхээ хамт цэргийн парад, албан ёсны үйл ажиллагаануудад тогтмол оролцдог. 2025 оны есдүгээр сард тэрбээр эцэгтэйгээ хамт Хятадад айлчилсан юм. Тухайн үед Yonhap агентлаг мэдээлэхдээ, энэхүү айлчлал нь эрх мэдлийг шилжүүлэх бэлтгэл байж болохыг илтгэж магадгүй гэж байв. Ким Жу Эг 13 орчим настай гэж таамагладаг бөгөөд төрсөн он сар өдрийг нууцалсан байна.

Эх сурвалж: Reuters