БНСУ-ын Олон улсын хамтын ажиллагааны байгууллага (КОЙКА)-аас Глобал сургалтын хөтөлбөрийн төгсөгчдөд зориулсан ‘Мэдлэг ба бодлого’ форум өнөөдөр Улаанбаатар хотод боллоо. Форумын гол зорилго нь КОЙКА-гийн сургалтын төгсөгчдийг дахин холбож, Солонгос Улсын хөгжлийн бодлого, туршлагыг Монголын урт хугацааны хөгжлийн бодлогод уялдуулах боломжийг хэлэлцэхэд чиглэжээ.

КОЙКА-гийн Монгол дахь суурин төлөөлөгч Жу Хэйн Нан форумын үеэр “Мэдлэгийг хуваалцах нь тогтвортой өөрчлөлт бий болгохын үндэс. Төгсөгчид маань сурсан мэдлэгээ өөрийн салбарт түгээн дэлгэрүүлж, улс орныхоо хөгжилд хувь нэмэр оруулах нь бидний зорилго” хэмээн онцлов.

Харин Солонгосын Ардчилал сангийн Монгол дахь төлөөлөгч Б.Болор-Эрдэнэ “КОЙКА 1995 онд Монголд төлөөлөгчийн газраа байгуулснаас хойш 3300 гаруй төрийн болон ТББ-ын төлөөллийг сургалт, тэтгэлэгт хамруулсан. Энэ бол хүний нөөцийн хөгжилд оруулсан үнэт хөрөнгө оруулалт юм” гэв.

КОЙКА нь БНСУ-ын Гадаад харилцааны яамны харьяа байгууллага бөгөөд дэлхийн 45 оронд боловсрол, эрүүл мэнд, хөдөө аж ахуй, дижитал засаглал, уур амьсгалын өөрчлөлт зэрэг салбарт хамтын ажиллагааны төсөл хэрэгжүүлдэг. Монгол Улсад тус байгууллага “Алсын хараа–2050” бодлогын хүрээнд дижитал засаглал, хот байгуулалт, хөдөө аж ахуй, эрүүл мэндийн салбарт хүний нөөцийн чадавхыг бэхжүүлэх, эрх зүйн орчныг сайжруулах чиглэлээр хамтран ажиллаж байна.

Эх сурвалж: KOICA Монгол дахь төлөөлөгчийн газар.