Их Британийн рекламын зохицуулалтын алба тавдугаар сард гарсан Zara брэндийн хоёр сурталчилгааг хэт туранхай, эрүүл бус харагдсан загвар өмсөгчдийг дүрсэлсэн хэмээн үзэж хоригложээ. Euronews-ийн мэдээлснээр, нэг рекламд цагаан сул цамц өмссөн загвар өмсөгчийн эгэм тодорч, нөгөөд нь цагаан даашинз түүний туранхайг улам тодотгосон байна.
Зохицуулагчдын тайлбарласнаар, зурагт сүүдрийн эффект ашиглан нэг хөлийг “мэдэгдэхүйц туранхай” харагдуулсан бөгөөд мөр, тохойн байрлал нь биеийн хэлбэр галбирын алдагдлыг улам тодруулжээ.
Эцэст нь брэндэд эдгээр зургийг дахин ашиглахгүй байх зөвлөмж өгч, Zara барааны жагсаалтад өөрчлөлт оруулан, уг зургуудыг хассан байна. Тус компани энэ хоёр загвар өмсөгч эрүүл мэндийн батламжтай бөгөөд гэрэл, өнгө дамжуулалтаас өөр засварлалт хийгдээгүй гэж мэдэгдэв.
Эх сурвалж: Euronews
