Долоодугаар сарын дөрөвний өдрийн байдлаар Сэлэнгэ мөрний нийт уртын дагууд усны түвшин өмнөх өдрөөс тав хүртэлхээс хорин таван см нэмэгдэж, олон жилийн дунджаас хорин зургаагаас жар хүртэл см давсан үзүүлэлттэй байна. Харин Ховд голын Мянгад сум орчмын усны түвшин одоог хүртэл үерийн түвшинг давсан хэвээр байгаа талаар албаныхан мэдээллээ.
Маргааш буюу долоодугаар сарын тавны өдөр Сэлэнгэ мөрөн Хялгант баг орчимд тав орчим см, Сүхбаатар хот орчимд арав орчим см-ээр нэмэгдэх төлөвтэй байгааг анхааруулж байна.
Мөн долоодугаар сарын дөрөвний өдөр баруун болон төвийн бүс, говийн аймгуудын зарим нутгаар, зүүн аймгуудын өмнөд хэсгээр бороо, дуу цахилгаантай аадар бороо орох төлөвтэй байгаа бөгөөд үүний улмаас богино хугацаанд гол мөрний усны түвшин огцом нэмэгдэх, хуурай сайр гуу жалгаар уруйн үер буух эрсдэл өндөр байгааг онцоллоо.
Иймд иргэд, аж ахуйн нэгжүүд болон аялж зугаалж яваа хүмүүсийг үерийн аюулаас урьдчилан сэргийлж, болзошгүй эрсдэлээс хамгаалах арга хэмжээг цаг алдалгүй авахыг Цаг Уур Орчны Шинжилгээний Газар анхааруулж байна.
Эх сурвалж: Цаг Уур Орчны Шинжилгээний Газар
