Засгийн газрын ээлжит хуралдаан долоодугаар сарын хоёрны өдөр болж, нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах чиглэлээр боловсруулсан хуулийн төслүүдийг яаралтай хэлэлцүүлэхээр шийдвэрлэлээ. Тодруулбал, Засгийн газраас өнгөрөгч зургаадугаар сарын хоринны өдөр Улсын Их Хуралд өргөн мэдүүлсэн Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн бусад хууль тогтоомжийн төслийг Монгол Улсын Их Хурлын чуулганы хуралдааны дэгийн тухай хуулийн дагуу яаралтай горимоор хэлэлцүүлэх хүсэлтийг УИХ-д хүргүүлэхээр тогтсон байна.

Энэхүү хуулийн төсөл батлагдсанаар нийслэл хотын авто замын ачааллыг бууруулах, гэр хорооллын дахин төлөвлөлтийг эрчимжүүлэх замаар иргэдийн амьдрах орчныг сайжруулахад чухал ач холбогдолтой гэж үзэж байна.

Эх сурвалж: Монгол Улсын Засгийн газар