Онцгой байдлын ерөнхий газраас мэдээлснээр, улсын хэмжээнд 2025 оны зургаадугаар сарын 14-нөөс 20-ны өдрүүдэд нийслэлийн найман дүүрэг, 16 аймгийн 33 суманд нийтдээ 148 удаагийн аюулт үзэгдэл, ослын дуудлага бүртгэгдсэн байна. Эдгээр дуудлагын дагуу төв болон орон нутгийн Онцгой байдлын байгууллагын алба хаагчид шуурхай ажиллаж, таван иргэний амь насыг авран хамгаалсан бол нийт 37 иргэнийг утаажилтын бүсээс гарган, аюулгүй байдлыг хангажээ.
Нийт бүртгэгдсэн тохиолдлын дийлэнх буюу 126 нь объектын гал түймэр байсан бол гурван удаа ой хээрийн гал түймэр, хоёр газар хөдлөлт, гурван удаа үер, 14 удаагийн хүний үйл ажиллагаатай холбоотой осол гарсан байна.
Хуурайшилт ихтэй энэ үед гал түймрийн тоо нэмэгдэх хандлагатай байгаа тул иргэдийн болгоомж, хяналт нэн шаардлагатайг мэргэжилтнүүд анхааруулж байна.
Эх сурвалж: ОБЕГ
