Өнөөдөр буюу зургадугаар сарын 11-нд “Бурхан багшийн их дүйчин өдөр 2025”-т зориулсан олон нийт, шашны болон соёлын арга хэмжээнүүд Улаанбаатар хотод өрнөж байна.

10:45 цагт МБШТ-Гандантэгчэнлин хийдийн Батцагаан цогчэн дуганд нээлтийн ёслол, хүндэтгэлийн үйл ажиллагаа зохион байгуулагдаж, Бурхан багшийн сургаал, гэгээрлийн утга агуулгыг олон нийтэд хүргэх эрдмийн илтгэл, ном уншлага өрнөсөн. Харин 12:00 цагаас эхлэн Д.Сүхбаатарын талбайд “Будда” фестиваль эхэлж, бясалгал, уран бүтээлийн үзэсгэлэн, уламжлалт зурхайн зөвлөгөө зэрэг олон талын үйл ажиллагаа өрнөж байна.

Мөн өнөөдөр 14:30 цагаас “Улаанбаатар галерей”-д JCI байгууллагын 2025 оны Ази, Номхон далайн бүсийн чуулганы талаарх хэвлэлийн бага хурал болох юм. Энэ чуулган зургадугаар сарын 12-15-ны хооронд зохион байгуулагдах бөгөөд бүс нутгийн бизнес, нийгмийн манлайлагчид оролцоно.

Оройн 21:00 цагт Бурхан багшийн их дүйчин өдрийн хүрээнд хүндэтгэлийн жагсаал Д.Сүхбаатарын талбайд болно. Энэхүү жагсаалд олон нийт, лам хуврагууд, соёлын төлөөлөгчид оролцох бөгөөд бурханы шашны энэрэл, эв нэгдлийн үзэл санааг илэрхийлэх болно.

Үүний зэрэгцээ Улаанбаатар хотод зохиогдож буй “Улаанбаатар биенналь” урлагийн наадам энэ сарын 20-ныг дуустал үргэлжилж байгаа бол орон нутагт Архангай аймгийн музейд “Байгалийг ойроос” түр үзэсгэлэн долоодугаар сарын 28-ныг хүртэл нээлттэй байна.

Хилийн чанадад ч Монгол соёл, спортын оролцоо үргэлжилж байгаа бөгөөд Английн Лондон хотод шатрын багийн түргэн болон түргэвчилсэн тоглолтын Дэлхийн аварга шалгаруулах тэмцээн энэ сарын 16-ныг дуустал үргэлжилж байна. Харин Чехийн Үндэсний музейд дэлгэгдсэн “Чингис хаан” олон улсын үзэсгэлэн нь зургадугаар сарын 22-ныг хүртэл гарч байгаа юм.