Монгол Улсын Ерөнхийлөгчийн ивээл дор зохион байгуулагдаж буй “Алтан хайч-2025” тэмцээн энэ сарын 20, 21-нд Төв аймгийн Зуунмод сумын “Өв соёлын өргөө”-нд болох гэж байна. Энэхүү тэмцээн нь “Цагаан алт” үндэсний хөтөлбөрийн хэрэгжилтийг эрчимжүүлэх, мал аж ахуйн үйлдвэрлэлд орчин үеийн техник, тоног төхөөрөмж, шинэ технологийг нэвтрүүлэх, түүхий эдийн чанарыг сайжруулах зорилготой.
Тэмцээн цахилгаан болон уламжлалт аргаар хонь ноослох хоёр төрлөөр явагдах бөгөөд шилдэг ноослогчдыг тодруулж, улсын аварга шалгаруулах юм. Энэ нь малчдын ур чадварыг үнэлэхийн сацуу ноос бэлтгэлийн стандартыг дээшлүүлэх, шинэчлэлийн хандлагыг олон нийтэд таниулах чухал арга хэмжээ болохыг зохион байгуулагчид онцолж байна.
Тэмцээний хүрээнд хонины ноосон бүтээгдэхүүний үзэсгэлэн худалдаа, хоолны фестиваль, шагайн харваа, үндэсний хувцас-хос морьтны уралдаан, ноос савж эсгий хийх тэмцээн зэрэг олон арга хэмжээ зохиогдох бөгөөд орон нутгийн уламжлал, соёлыг сурталчлах өргөн цар хүрээтэй арга хэмжээ болох юм.
Эх сурвалж: Төв аймгийн Засаг даргын Тамгын газар
