Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхээс 2025 оны нэгдүгээр сарын 9-ний өдөр гаргасан шийтгэх тогтоолын тоймыг тус шүүхийн шүүгч Г.Алтанцэцэг 2025 оны тавдугаар сарын 29-нд олон нийтэд танилцууллаа.

Энэхүү хэргээр, иргэн Э.Х согтууруулах ундаа хэрэглэсэн үедээ бага насны хүүхдүүдээ орхиж, гэрээ дулаацуулах, хоол цай хийх зэрэг анхан шатны асаргаагүй орхисон нь нэг настай, дөрвөн сартай охин Г.Г-гийн амь насанд хүргэсэн болох нь хэрэгт цугларсан нотлох баримтаар тогтоогджээ. Хүүхэд 2024 оны нэгдүгээр сард хэт хүйтэнд гэртээ осгож нас барсан байна.

Шүүхээс Э.Х-г Эрүүгийн хуулийн тусгай ангийн 16.11 дүгээр зүйлийн 3 дахь хэсэгт зааснаар гэм буруутайд тооцож, хоёр жилийн хорих ял оноосон байна.

Шүүхийн тогтоолд дурдсанаар, Э.Х нь:

• Монгол Улсын Үндсэн хуулийн 17.1.1-д заасан “үр хүүхдээ өсгөн хүмүүжүүлэх журамт үүргээ”,

• Гэр бүлийн тухай хуулийн 26.2.1-д заасан “хүүхдээ эрүүл чийрэг өсгөн бойжуулах” үүргээ,

• Хүүхдийн эрхийг хамгаалах тухай хуулийн 5.2, 5.3, 10.1.3-д тус тус заасан “аюулгүй орчинд амьдруулах, анхаарал халамжаар хангах, эрсдэлээс урьдчилан сэргийлэх” үүргээ ноцтойгоор биелүүлээгүй нь тогтоогдсон.

Энэхүү хэрэг нь эцэг эхийн анхаарал, халамжийн үүргийг үл тоомсорлосноос хүүхдийн амь насыг эрсдэлд оруулсан харамсалтай жишээ болж, нийгэмд анхаарал хандуулах сэдэл өгч байна.

Эх сурвалж: Шүүхийн мэдээллийн цахим сан