2025 онд нийслэлийн хэмжээнд 15 байршилд нийт 186.839 ам метр талбай бүхий явган хүний замыг шинэчлэх ажил хэрэгжиж байна. Тус ажлыг зөвхөн хучилтын шинэчлэл төдий бус, инженерийн дэд бүтцийн бүрэн тохижилттой хамтатган гүйцэтгэж байгаа нь онцлог юм.

Улаанбаатар хотын Захирагчийн ажлын албанаас мэдээлснээр, энэ жил ил гарсан цахилгааны кабелуудыг газар доогуур хонгилын системээр байршуулж, борооны ус зайлуулах шугам хоолойн шийдлийг нэг дор шийдэхээр төлөвлөжээ. Энэхүү бүтээн байгуулалт нь явган зорчигчийн аюулгүй, тав тухтай орчныг бий болгоход чиглэж буй юм.

УБЗАА-ны Тохижилт, хог хаягдлын удирдлагын газрын дарга Г.Билгүүн “Энэ жилийн явган хүний замын ажлын онцлог нь зөвхөн өнгө үзэмж бус, бүтцийн хувьд шинэчлэл хийхэд оршино. Замын дагуу байрлах хуучин зогсоолууд, буцаж ухрах шаардлагатай байршлууд нь хөдөлгөөний аюул үүсгэдэг. Иймээс явган хүний замыг 3-4 метрийн өргөнтэй, стандартын дагуу хүн төвтэй хэлбэрээр шинэчилж байна” гэж онцолжээ.

Томоохон гудамж болох Энхтайваны өргөн чөлөө, Их тойруу, Бага тойруу, Их Монголын гудамж, Чингисийн өргөн чөлөө дагуух есөн байршилд одоогоор явган хүний замын шинэчлэл үргэлжилж байгаа бөгөөд иргэдийн эрүүл, аюулгүй орчинд алхах нөхцөл бүрдүүлэх зорилготой аж.

Эх сурвалж: УБЗАА