“Тэрбум мод тарих үндэсний өдөр”-үүдийн хүрээнд Байгаль орчин, уур амьсгалын өөрчлөлтийн сайд С.Одонтуяагийн санаачилгаар “Хашаандаа таван мод тарья” экологийн аяныг 2025 оны тавдугаар сарын 15-наас эхлүүлээд байна. Аян нь орчны бохирдлыг бууруулж, уур амьсгалын өөрчлөлтийг сааруулах зорилготой бөгөөд мод үржүүлгийн чиглэлээр үйл ажиллагаа явуулдаг байгууллагууд, төрийн бус байгууллага, нөхөрлөлүүдийг дэмжихийг зорьж байгаа юм.

Энэхүү аяныг нийслэлийн 7 дүүргийн 108 хороонд, мөн 16 аймгийн 32 суманд хэрэгжүүлэхээр төлөвлөсөн. Нийслэлийн хэмжээнд 8000 гаруй өрхийн хашаанд өрөл, голт бор, монос, гүйлс, буйлс зэрэг навчит модны 3–4 настай 40 мянган суулгац тарина. Айл өрхүүд мод тарих, арчлах үйл ажиллагаанд хамрагдах бөгөөд харьяа аж ахуйн нэгж, ТББ, нөхөрлөлүүд тэднийг усалгаа, хөрс сийрүүлэлт, хөнөөлт шавьжтай тэмцэх зэрэг мэргэжлийн зөвлөгөөгөөр хангана.

Мөн иргэд уг аянд оролцох хүсэлтээ E-Mongolia апликэйшн ашиглан илгээж бүртгүүлж болох юм. Харин аяныг дэмжиж, хамтран ажиллах сонирхолтой аж ахуйн нэгж, байгууллагууд Байгаль орчин, уур амьсгалын өөрчлөлтийн яамны 101 тоотод хандана уу.

Түүнчлэн Улаанбаатар хотын 2040 он хүртэлх хөгжлийн ерөнхий төлөвлөгөөнд дахин төлөвлөлтөд хамрагдсан айл өрхүүд тус аянд хамрагдахгүй болохыг Байгаль орчин, уур амьсгалын өөрчлөлтийн яамнаас мэдээлсэн байна.

Эх сурвалж: Байгаль орчин, уур амьсгалын өөрчлөлтийн яам