Нийслэлийн ногоон бүсэд ой, хээрийн түймрийн эрсдэл нэмэгдэж байгаатай холбогдуулан мэргэжлийн байгууллагууд хамтран урьдчилан сэргийлэх эргүүл, хяналтын ажлыг эхлүүлжээ. Энэ нь Улсын онцгой комиссын 2025 оны 01 дүгээр албан даалгавар, Нийслэлийн Засаг даргын А/373 захирамжийн хэрэгжилтийг хангах зорилготой юм.

Энэ хүрээнд НОБГ, НЦУГ, НБОГ болон Богдхан уулын дархан цаазат газрын хамгаалалтын захиргааны нийт 24 албан хаагч таван автомашинтайгаар Баянзүрх, Сүхбаатар, Сонгинохайрхан, Хан-Уул, Чингэлтэй дүүргийн ногоон бүсэд урьдчилан сэргийлэх хяналт шалгалтыг эхлүүлсэн байна.

Өнгөрсөн онд нийслэлд шар өвсний гал түймрийн 48 тохиолдол бүртгэгдэж, 62.7 га талбай шатаж, байгаль орчин болон иргэдийн өмчид хохирол учруулсан нь энэ ажил ямар чухал болохыг илтгэж байна.

Нийслэлийн Онцгой байдлын газраас ногоон бүсэд зорчиж буй иргэд, зуслангийн айлуудад дараахийг анхааруулж байна:

• Цогтой үнс нурмаа тагтай төмөр саванд хийж хэвших

• Тамхи, чүдэнз, ил галыг бүрэн унтраах

• Шар өвс, хог хаягдлыг ил задгай шатаахгүй байх

Иргэдийн хариуцлагатай байдал нь байгаль орчноо хамгаалах, аюулт нөхцөл байдлаас сэргийлэх хамгийн чухал хүчин зүйл юм.

Эх сурвалж: НОБГ