“Номын соёлт ертөнц” төрийн бус байгууллагаас жил бүр уламжлал болгон зохион байгуулдаг хаврын номын баяр энэ жил 37 дахь удаагаа зохион байгуулагдаж байна. Энэ удаагийн номын баярыг Монгол Улсын Ерөнхийлөгч У.Хүрэлсүхийн ивээл дор Ерөнхийлөгчийн Тамгын газар, Байгаль орчин, уур амьсгалын өөрчлөлтийн яам, Соёл, спорт, аялал жуулчлал, залуучуудын яам, нийслэлийн Засаг даргын Тамгын газар, нийслэлийн Соёл, урлагийн газар болон “Номын соёлт ертөнц” ТББ хамтран зохион байгуулж байгаа юм.

“Илүү их уншъя” уриатай энэ удаагийн баяр гурван өдрийн турш үргэлжилж, уншигчдын дунд ном унших соёл, дадлыг төлөвшүүлэх, зохиолч, хэвлэн нийтлэгчид, судлаачдын бүтээл туурвилыг олон нийтэд хүргэх, нийтээрээ номтой нөхөрлөх эерэг уур амьсгалыг түгээх зорилготой.

Номын баярын хүрээнд:

• Үзэсгэлэн худалдаа

• Зохиолч, уншигчдын уулзалт

• Дотоод, гадаадын хэвлэлийн байгууллагуудын маркетинг, борлуулалтын уулзалт

• Шинэ номын нээлтүүд

• “Байгаль экологийн 50 ном”-ын танилцуулга

• Хүүхдэд зориулсан тусгай хөтөлбөрүүд зэрэг өргөн цар хүрээтэй арга хэмжээ зохион байгуулагдаж байна.

Жил бүрийн хавар, намарт зохиогддог номын баярт дунджаар 300 мянга гаруй уншигч хүрэлцэн ирж, 200 гаруй хэвлэн нийтлэгч, 300 орчим зохиолч, орчуулагч, редактор, зураач, судлаач идэвхтэй оролцдог уламжлал тогтоод байгаа.

Мөн 35 дахь удаагийн номын баяраас хойш “Номын соёлт ертөнц” ТББ-аас гадаадын уншигч, хэвлэн нийтлэгчидтэй хамтран ажиллах зорилгоор “Нөхөрлөлийн хөтөлбөр”-ийг хэрэгжүүлж эхэлсэн бөгөөд энэ удаагийн баярт ОХУ, БНХАУ, БНСУ-аас зохиолч, хэвлэн нийтлэгчид хүрэлцэн ирж оролцож байна.

Эх сурвалж: “Номын соёлт ертөнц” ТББ