Германы парламентын доод танхим Бундестаг тус улсын Үндсэн хуульд нэмэлт, өөрчлөлт оруулах саналыг гуравны хоёрын саналаар дэмжлээ. Энэхүү өөрчлөлтөөр засгийн газар илүү их хэмжээний зээл авах боломжтой болж, зэвсэгт хүчин болон дэд бүтцийн хөрөнгө оруулалтыг нэмэгдүүлэх нөхцөл бүрдэх юм.

Энэхүү санал хураалт нь Европын батлан хамгаалах бодлого болон Украинд үзүүлэх дэмжлэгт чухал нөлөө үзүүлэх тул түүхэн шийдвэр гэж тодорхойлж байна.

Германы канцлер болох магадлалтай байгаа Фридрих Мерц мэдэгдэл хийхдээ:
"Европын эсрэг Оросын түрэмгий дайны үед Германы байр суурийг бэхжүүлэхийн тулд эдгээр өөрчлөлт зайлшгүй шаардлагатай" гэж онцолжээ.

Ф.Мерцийн төлөвлөгөөнд:

• Цэргийн зардлыг засгийн газрын зээлийн хязгаарлалтаас чөлөөлөх,
• 500 тэрбум гаруй еврогийн дэд бүтцийн сан байгуулах санал тусгагдсан байна.

Үндсэн хуульд өөрчлөлт оруулах саналыг 513 гишүүн дэмжиж, 207 гишүүн эсэргүүцсэн бөгөөд шаардлагатай гуравны хоёрын санал авахын тулд Ф.Мерцийн консерватив Христийн ардчилсан холбоо/Христийн нийгмийн холбоо эвсэл болон Социал-демократ нам эцсийн мөчид Ногоон намын шаардлагыг өөрчлөлтөд тусгасан аж.

Одоо энэхүү хуулийн төслийг парламентын дээд танхим болох Бундесрат буюу 16 мужийн төлөөлөл хэлэлцэх бөгөөд санал хураалт баасан гарагт болно.

Эх сурвалж: BBC