Япон хэл сурсныхаа төлөө тэтгэлэг хүртэх гайхалтай боломжийг Япон улсын “Аймэйдо Альфа” групп Монгол залууст санал болгож байна.
Тус групп “Япон хэлний N4 – N3 түвшинд хүрэхийг хичээцгээе” уриатай хөтөлбөр Монгол улсад хэрэгжүүлж эхэллээ. 10,000,000 иен буюу 200,000,000 төгрөгийн сан бүхий “Аймэйдо Альфа Асаякэ тэтгэлэг” хөтөлбөр юм. Тус группын Ерөнхий захирал Такэши Огино “Асаякэ” гадаад хэл сургалтын төвийн суралцагчидтай уулзалт хийхдээ тус тэтгэлгийг олгож эхлэхээ зарлалаа.
Шагналт тэтгэлэг учир буцаах шаардлагагүй гэдгийг санаачлагчид онцолж байна.
Тэтгэлгийг япон хэлний түвшин тогтоох шалгалтын N4, N3-т тэнцсэн суралцагчид авах эрхтэй. Тэтгэлгийн хэмжээ дээр дурдсан түвшин бүрт $500 байх ажээ. Өөрөөр хэлбэл, тухайн суралцагч 2-3 сарын хугацаанд N4, N3 түвшингийн шалгалт дараалан өгч, тэнцсэнээр нийт $1,000 долларын тэтгэлгийн эзэн болно гэсэн үг юм.
“Асаякэ” японы хэлний сургалтын төвд суралцсан хүмүүс энэ тэтгэлэгт хамрагдах боломжтой гэдгийг Такэши Огино захирал онцоллоо.
Мөн одоо суралцаж байгаа оюутнуудад тусгай тэтгэлэг олгохоор бэлтгэжээ. Ирэх оны 2-р сар гэхэд N4 түвшинд тэнцвэл $800, 3-р сард тэнцвэл $600, 4-р сард тэнцвэл $400 гэсэн шатлалтайгаар тэтгэлэг олгох юм байна.
Япон хэлний мэдлэгийн шалгалтын түвшин таван ангилалтай байдаг ба доорх хүснэгтээр түвшин тус бүрийн бүтэц болон түвшинг тодорхойлох аргуудыг тайлбарласан болно.
| Түвшин |
Агуулга |
| N1 |
Нийгмийн өргөн хүрээнд хэрэглэдэг япон хэлийг бүрэн ойлгох чадвартай байх. Унших: Аливаа сэдвээр бичсэн сонины өгүүлэл, санал шүүмжийг уншин, өгүүлбэрийн бүтэц, агуулгын дотоод логикийг бүрэн ойлгодог байх. Тухайн сэдвийн далд утга санаа, үг хэллэг, илэрхийлэл, тайлбар, график зэргийг бүрэн ойлгох чадвартай байх. Сонсох: Тодорхой сэдвээр ярилцсан яриа, мэдээ, лекцийг сонсоод, агуулга, хоорондын уялдаа холбоо, онцлог зэргийг ойлгон, гол санааг нэгтгэн дүгнэх чадвартай байх. |
|
N2 |
Нийгмийн өргөн хүрээнд хэрэглэдэг япон хэлийг тодорхой хэмжээгээр ойлгодог байх. Унших: Аливаа сэдвээр бичсэн сонин, сэтгүүлийн нийтлэл, мэдээ, энгийн санал шүүмжийг уншаад агуулга, утга санаа, үг хэллэг, илэрхийлэл, тайлбар, график зэргийг ойлгодог байх. Сонсох: Өдөр тутмын энгийн сэдвээр ярилцсан яриа, мэдээг сонсоод түүний агуулга, утга санаа, хоорондын уялдаа холбоо зэргийг ойлгон, гол санааг нэгтгэн дүгнэх чадвартай байх. |
| N3 |
Өдөр тутмын хэрэглээний япон хэлийг тодорхой түвшинд ойлгох чадвартай байх. Унших: Энгийн сэдэв бүхий бичвэр зэргийг уншин, ойлгодог байх, сонины мэдээний гарчигаас агуулгыг нь ойлгож чадах, улмаар тухайн өгүүлбэрийг өөр үг хэллэгээр илэрхийлэхэд гол утга санааг нь зөв ойлгох чадвартай байх. Сонсох: Өдөр тутмын сэдвээр ярилцаж буй яриаг сонсоод агуулга, утга санаа, хоорондын уялдаа холбоо зэргийг ерөнхийд иь ойлгодог байх. |
| N4 |
Анхан шатны япон хэлийг ойлгох чадвартай байх. Унших: Өдөр дутмын энгийн сэдэвтэй бичвэрийг уншиж ойлгох, үндсэн үгийн сан, канжи үсгийн мэдлэгтэй байх. Сонсох: Өдөр тутмын сэдвээр удаавтар ярилцаж буй яриаг сонсоод агуулгыг ерөнхийд нь ойлгодог байх. |
| N5 |
Анхан шатны япон хэлийг тодорхой хэмжээнд ойлгодог байх. Унших: Хирагана, катакана үсэг, өдөр тутам хэрэглэдэг үг хэллэг, канжи үсгээр бичсэн хялбар, богино хэмжээтэй, өдөр тутмын энгийн сэдэвтэй бичвэрийг уншиж ойлгодог байх. Сонсох: Анги танхим болон өдөр тутмын ойр зуурын яриаг сонсоод өөрт хэрэгтэй мэдээллийг авч чаддаг байх. |
