Наймдугаар сарын 25-ны байдлаар Дархан чиглэлийн 45 километр замын хөдөлгөөнийг нээжээ. Мөн цементийн нийлүүлэлт, тээвэрлэлтийн асуудал хэвийн болсон талаар мэдээллээ.

Зам байгуулалтын гүйцэтгэгч компаниуд уртасгасан цагаар ажиллаж байгаа аж.

Одоогоор Аглагийн хийд рүү салдаг хэсгээс Урьхан хүртэл 20 километр, Баруунхараагийн сэтэрхий хөтлөөс Хустайн давааны ар хүртэл 21 километр асфальт хучилтын ажил үлджээ.

Зам тээвэр, хөгжлийн сайд С.Бямбацогт "Өнөөдөр Дарханы замд ажиллаж, замын ажлын явц байдалтай танилцлаа. Хүн хүч, машин техникээ зөв хуваарилж ажлаа цаг хугацаанд нь, чанартай шахаж хийж чадвал нэг урсгал, хоёр эгнээний хөдөлгөөнийг нээх боломж байна. Гэхдээ гүйцэтгэгч компаниуд өөрсдөө санхүүжилт, цаг агаарын нөхцөл байдалтай уялдуулан ажлаа урьдчилан харж төлөвлөж, зөв зохион байгуулах хэрэгтэй байгааг хэлж санууллаа" гэв.