Боловсрол, шинжлэх ухаан, спортын байнгын хорооны өчигдрийн хуралдаанаар Боловсрол шинжлэх ухааны сайд Л.Энх-Амгалан мэдээлэл хийсэн билээ. Үүний дараа тэрээр МСҮТ-д сурдаггүй хүүхдүүдийн нэрээр төрөөс мөнгө завшдаг тухай мэдэгдсэн юм. 

Сайд Л.Энх-Амгалан "Мэргэжлийн болон техникийн боловсролын сургалтын байгууллагууд манай яаманд шилжиж ирээд таван сар орчим болж байна. Коллеж, МСҮТ-ийн сурагчдын 200,000 төгрөгийг олгохоор мэдээллийг E-mongolia системээр бүртгэхэд их, дээд сургуульд бүртгэлтэй, ЕБС-д сурдаг 4800 хүүхдийн регистрийн дугаарыг МСҮТ-д давхар бүртгэж 2.3 тэрбум төгрөг төрөөс авах байсныг ил болгосон. Нэг ёсондоо ийм хэмжээний мөнгийг бид хэмнээд байна гэсэн үг. Өмнөх жилүүдэд нууцаар, хууль бус үйлдлээр төрөөс хулгай хийж, хумсалсан, халаасалсан хэдэн тэрбум төгрөг байгаа вэ гэдгийг тогтоож, сургууль, захирал, төрийн албан хаагч бүрээр нь хууль хяналтын байгууллага шалгах ёстой. Төрийн мөнгө түрүүвчинд орох ёсгүй" хэмээн цахим хуудастаа бичсэн байна.