АНУ-ын сансар судлалын инженер, зохиолч Др.Роберт Зубрины "The Case for Mars" буюу "Марсын сорилт" ном монгол хэлнээ хөрвүүлэгдэн, нээлтээ хийх гэж байна. 

Тус номын эрхийг "Mars V" нийгэмлэгийн хамт олон авч орчуулсан бөгөөд номын нээлтэд зохиолч Др.Роберт Зубрин хүрэлцэн ирэх юм. 

Монголын говьд тусгай сонирхлын аялал жуулчлалыг хөгжүүлэх зорилт бүхий сансрын сургалт судалгаа, сансар судлалын Шинжлэх ухааны парк байгуулах зорилгоор 2018 онд "Mars V" төслийг санаачлан эхлүүлж байжээ. 

Энэхүү цогц санаачилгыг хэрэгжүүлснээр сансар судлалаар дэлхийд тэргүүлж буй АНУ, ОХУ, БНЭУ, БНХАУ, Япон болон бусад хөгжингүй орнуудтай хамтран ажиллах орчин бүрдэж, орчин үеийн, өндөр технологийг өөрийн улсад нэвтрүүлэх, тусгай сонирхлын аялал жуулчлалын томоохон урсгалыг Монголын говьд бий болгож, энэ чиглэлийг сонирхдог жуулчид, аялагчид, мэргэжлийн хүмүүсийг татах замаар гаднаас орж ирэх хөрөнгө оруулалтыг нэмэгдүүлэх боломжтой юм. 

"Mars V" төслийнхөн зорилгодоо нэг алхам ойртож, Монгол Улсыг олон улсын сансар судлалын томоохон байгууллагуудад таниулах, гадны хөрөнгө оруулагчдыг татахад томоохон хувь нэмэр оруулах, хөгжингүй орнуудтай хамтын ажиллагаагаа тэлэхэд чухал ач холбогдол бүхий Др.Роберт Зубрины "Марсын сорилт" номын нээлтийг 2022 оны Зургадугаар сарын 22-ны өдөр МУИС-ийн Шинэ номын сангийн 303 тоотод зохион байгуулах гэж байна.

Тус арга хэмжээнд Монгол Улсын хөгжлийн бодлого, хөтөлбөрийг тодорхойлоход манлайлан оролцогчид, сансар судлалаар дэлхийд тэргүүлж буй улсуудын элчин сайдын яамдууд, олон улсын байгууллагууд, түүнчлэн тухайн салбарын шинжлэх ухааны байгууллагууд, тэргүүлэх мэргэжилтнүүд, төслийг багийн гишүүд, дэмжигчид зэрэг зөвхөн тусгайлан урьсан цөөн тооны зочдын дунд зохион байгуулагдаж байгаа аж.