Хүүхэд багачууд болон харваан спортыг сонирхогч хэн бүхэнд зориулан бүтээсэн "Гайхамшигт Харваа" буюу "Amazing Archery" номын монгол хэл дээрх хэвлэлтийн нээлт 2022 оны Зургадугаар сарын 11-ны 11:00 цагт Зайсан Хилл цогцолборт байрлах Хүүхдийн Дүдү музейд болох гэж байна.

Тус номонд 60 гаруй мянган жилийн өмнөх археологийн сурвалжтай харвааны уламжлал угсаа нь хүн төрөлхтөний түүхийг гатлан явсаар хэрхэн хөгжиж орчин цагийн хүчирхэг спортын төрөл болсон онцлогийг өгүүлсэн байна. Мөн олимпын наадамд байт харваа хэрхэн багтсан тухай, одоо өргөжин тэлсэн хорь гаруй харвааны төрлийн тухай бичжээ. Монгол нутаг дахь харвааны уламжлал, хадны зураг, буган хөшөөн дэх харваачдын түүх, орчин цагийн төрөлжин хөгжсөн уламжлалт харвааны тухай мөн багтсан байна.

"Гайхамшигт Харваа" зурагт номыг бүтээхэд олон чиглэлийн мэргэжлийн эрдэмтэн судлаачдын зөвлөгөө дэмжлэг хамгийн том түшиг тулгуур болсон байна. Мөн номын зураачаар уран бүтээлч Т.Эрдэнэтуяа ажилсан бөгөөд түүний хүүхэд багачуудад зориулсан, уламжлалт харваатай уялдсан 66 бүтээл багтжээ.

Шинэхэн номын талаар Монголын Байт харваан холбооны Ерөнхийлөгч С.Эрдэнэболд "Танин мэдэхүйн цогц мэдээлэл агуулсан энэ ном монголын байт харвааг хөгжүүлэх, олон нийтэд спортоо суртачлах, уламжлалт харвааны соёлдоо түшиглэн дэлхийд монгол тамирчдын амжилт, чансааг өсгөхөд бага ч атугай хувь нэмэр болно гэж итгэж байна.

Мөн харваагаар, их спортоор хичээллэхийг хүсэгч багачууд, дүү нарт маань замын зураг болж, урам зориг өгнө гэж найдаж байна" гэсэн юм.

"Гайхамшигт Харваа" танин мэдэхүйн номыг тун удахгүй англи, турк, япон, иран болон бусад орны хэл дээр хэвлэгдэх ба нийтлэг загварыг бодож англиар нэрлэсэн аж.

Та бүхэн хүүхэд багачууддаа зориулан энэхүү номыг авах бол 94000000 утсанд зурвас илгээж захиалах боломжтой юм.

Мөн номын нээлтэд цаг гарган хүүхэд багачуудтайгаа хүрэлцэн ирээрэй хэмээн урьж байна.