Монгол Улсын арслан Э.Оюунболдоос хориотой бодис илэрч барилдах эрхийг нь найман жилээр хасах шийдвэрийг МҮБХ-ноос гаргасан. Харин Э.Оюунболд МҮБХ-ны тус шийдвэрийг эсэргүүцэн, Монголын олон улсын ба үндэсний спортын арбитрын шүүхэд гомдол гаргасан байдаг. Тэгвэл Монголын олон улсын ба үндэсний спортын арбитрын шүүх түүний гомдлыг хянан хэлэлцээд, МҮБХ-ны шийдвэрийг хүчингүй болгох шийдвэр гаргажээ. Харин тус байгууллагын шийдвэрийг хүлээн зөвшөөрөх эсэх талаар МҮБХ-ны тэргүүн, улсын заан Ц.Магалжаваас тодрууллаа.

-Өнгөрсөн долоо хоногийн сүүлээр Э.Оюунболдын барилдах эрхийг сэргээсэн талаар мэдээлэл гарсан. Та МҮБХ-ны тэргүүний хувьд энэ талаар тайлбар хийхгүй юу?

-Энэ талаар ирэх /энэ/ долоо хоногоос МҮБХ-оос хэвлэлийн хурал хийнэ. Тэр хурал дээр тодорхой тайлбараа танилцуулах болно. Би яг одоо барилдаан дээр явж байна.

-Арбитрын шүүхээс гаргасан шийдвэрийг МҮБХ дагах эрх зүйн үндэстэй юу?

-Эхлээд зөв ярих хэрэгтэй. Арбитрын шүүх гэж байхгүй. МҮБХ-ны шийдвэрийг хүчингүй болгосон тэр газар бол нэг төрийн бус байгууллага байгаа юм. Ямар үндэслэлээр эрхийг нь сэргээж байгаа юм бэ гэдэг баримт бичгийг нь харна. Зарим мэдээллийн хэрэгслээр энэ талаарх мэдээлэл гараад л байгаа. Яг Э.Оюунболд өөрөө бол  энэ асуудлаар байр сууриа илэрхийлээгүй.

Эх сурвалж: Өглөөний сонин