Нийслэл дэх Захиргааны хэргийн анхан шатны шүүхийн хуралдаанаар Энканто хотхонд үйл ажиллагаа явуулдаг "Оргил" худалдааны төвийн өмнөх "авто зогсоол"-ын газрыг чөлөөлөх шийдвэрийг өнгөрсөн Наймдугаар сард гаргасан билээ. 

Тодруулбал, "Камдер" ХХК-ийн эзэмшилд байдаг “Оргил” худалдааны төвийн автомашины зогсоолоос тус компанийн эзэмшилд хамааралгүй газрыг чөлөөлүүлэх нэхэмжлэл иргэн А.Базар нийслэл дэх Захиргааны хэргийн анхан шатны шүүхэд гаргасан байдаг билээ. 

Тэгвэл өнөөдрийн Нийслэлийн удирдах ажилтнуудын шуурхай зөвлөгөөн дээр РЦНК орчмын талбайг ногоон байгууламж болгон тохижуулах, Энканто хотхон орчимд явган хүний замтай болгох, Уран ган ХХК-ийн голын эрэг рүү түрж эзэмшсэн газрын эрхийг цуцлах зэрэг шийдвэрийг гаргажээ. 

Энэ талаар нэхэмжлэгч иргэн А.Базар "Оргил худалдааны төвийн хууль бус газрыг чөлөөлж, явган хүний зам, дугуйн зам гаргахаар болсон гэнэ. Энэ асуудлаар хоёр жил хөөцөлдөж, Мэргэжлийн хяналтын газар, шүүхэд хандаж явлаа. Маргаанаа шүүхээр шийдүүлээд, шүүхийн шийдвэр гүйцэтгэлд шилжүүлээд 4 сар гаруй хугацаа болж байгаа юм. Эцэст нь ашгүй нэг зам чөлөөлөхөөр болж. Баяртай байна. Яг зөв чөлөөлүүлэх, дугуйн зам болон явган хүний зам гаргуулахад анхаарна аа. Дутуу хийчиж магад шүү дээ, тийм ээ" хэмээжээ.