Хөгжлийн банктай холбоотой асуудал улам хүндэрсэн, зээлээ эргэн төлөөгүй, чанаргүй гэсэн ангилалд орсон компаниудыг олон нийтэд зарлаад буй. Тодруулбал, 2014-2019 онд зээл аваад төлөөгүй 26 компанийг Хөгжлийн банк шүүхэд өгч, 841 тэрбум төгрөгийн нэхэмжлэл гаргасан байна.
Тэгвэл энэ асуудлаар "Иргэдийн шударга шүүх” ТББ-ын Удирдах зөвлөлийн гишүүн Б.Сайнбаяр мэдээлэл хийлээ.
Тэрээр "Ганцхан жишээ хэлье. Хөгжлийн банкнаас ихэвчлэн банктай хүмүүс зээл авсан байна. Жилийн зургаан хувийн хүүтэй зээл аваад банк бусаараа 36 хувиар мөнгө хүүлж байна. Үүнийг залуучууд, худалдаачид төлж байгаа.
Тиймээс Хөгжлийн банктай холбоотой асуудлын хүрээнд АТГ, Эрүүгийн цагдаагийн газар, Үндэсний аюулгүй байдлын зөвлөл ажлаа хий. Хэрвээ энэ асуудлыг нааштай шийдэхгүй бол бид тэмцлийн өөр хэлбэрийг сонгоно" гэлээ.
