Монгол улс АНУ-ын хооронд шууд нислэг эхлүүлэх бэлтгэл ажлын явцын талаар холбогдох албаны хүмүүс ИНЕГ-т мэдээлэл солилцох уулзалт, хурлыг хоёр дахь удаагаа зохион байгууллаа.
Хурлаар хоёр улсын Агаарын харилцаа тогтоох, Агаарын тээврийн хэлэлцээр байгуулах үйл явц, АНУ-ын Холбооны Нисэхийн Захиргаа, Тээврийн аюулгүй байдлын агентлагаас шууд нислэгтэй болоход бусад улсад тавьдаг шаардлага, бэлтгэл ажлын талаар хэлэлцлээ.
Мөн “МИАТ” ХК-иас Монгол-АНУ хооронд шууд нислэг үйлдэх, тухайн чиглэлийн агаарын хөлөг сонголтын талаар танилцууллаа.
ИНЕГ-ын дарга С.Мөнхнасан “Энэхүү нислэг нээлттэй болсноор манай улсын Иргэний Нисэхийн аюулгүй байдал, аюулгүй ажиллагааны дэвшил гарна. Мөн АНУ-ыг зорих, тус улсаас Монгол улсыг зорих иргэдийн хувьд цаг хугацаа, мөнгө санхүүгийн хувьд хэмнэлт болох давуу талтай” гэв.
Монгол улсаас АНУ-д суугаа Элчин Сайд Ө.Батбаяр “Хоёр улсын хооронд шууд нислэг нээх цаг хугацаа болоод нөхцөл боломж нээлттэй болсон. Энэ ажлыг шуурхайлахын тулд АНУ-ын талтай уулзалтуудыг хийж, хэлэлцээр шат шатандаа нааштайгаар өрнөж байгаа. Бид 2023 он гэхэд эхний нислэгээ үйлдэхээр зорилт тавин ажиллаж байна” гэлээ.
Харин “МИАТ” ТӨХК-ны гүйцэтгэх захирал Б.Мөнхтамир “Монгол улс АНУ-ын хооронд шууд нислэг хийх нь эдийн засгийн болоод хоёр улсын хамтын ажиллагаанд өндөр ач холбогдолтой үйл явдал болно” гэдгийг онцолсон юм.
Энэ удаагийн хуралд ИНЕГ-ын дарга С.Мөнхнасан, ИНЕГ-ын АТБЗГ-ын дарга Г.Батбаяр, ИНЕГ-ын Нисэхийн аюулгүй ажиллагааны хяналт зохицуулалтын албаны Ерөнхий менежер Г.Амарцэцэг, “МИАТ” ТӨХК-ийн Гүйцэтгэх захирал Б.Мөнхтамир, “МИАТ” ТӨХК-ийн Нислэг үйлдвэрлэлийн зохицуулалт, инженерингийн хэлтсийн дарга Э.Гантулга, ИНЕГ-ын Агаарын тээврийн бодлого, зохицуулалтын газрын Агаарын харилцааны тасгийн дарга Д.Түвшинбаяр болон бусад мэргэжилтнүүд оролцсоноос гадна, Монгол улсаас АНУ-д суугаа Элчин Сайд Ө.Батбаяр, Олон улсын гэрээ, эрх зүйн газрын захирал С.Сүхболд, Иргэний нисэхийн бодлогын хэрэгжилтийг зохицуулах газрын дарга Ч.Мөнхтуяа, Гадаад хамтын ажиллагааны хэлтсийн Б.Нямдаваа зэрэг албаны хүмүүс онлайнаар оролцож санал бодлоо хуваалцсан юм.
