Хөдөлмөрийн баатар Н.Түвшинбаяр зодуулж, найман сарын хугацаанд эмчлүүлсэн ч биеийн байдал дээрдэхгүй байсаар таалал болсон улсын өсөх идэр начин Э.Энхбатын хэргийг шалгаж байна.

Хохирогчийн өмгөөлөгчийн хүсэлтээр яллагдагч Н.Түвшинбаярыг цагдан хориод байгаа билээ.

Тэгвэл, Булган аймгийн ИТХ-ын төлөөлөгч С.Гал-Эрдэнийг яллагдагчаар татах хүсэлтийг прокурорт гаргаад байгаа юм байна. Учир нь түүнийг “Иргэний үүргээ биелүүлж, зодооныг салгаж, цагдаагийн байгууллагад хандаагүй. Өрөөнийхөө хаалгыг албаар түгжсэн байж болзошгүй” хэмээн буруутгаж байгаа гэх мэдээлэл гарчээ.

Талийгаач Э.Энхбат, Н.Түвшинбаяр нарын зодооныг эхлүүлсэн гэх Булган аймгийн ИТХ-ын дарга Д.Эрдэнэбатыг мөн яллагдагчаар татаж магадгүй гэнэ. Учир нь талийгаач Э.Энхбат начны ар гэрийнхэн мэдээлэхдээ "“Тэд хамт сууж байгаад Э.Энхбат ариун цэврийн өрөө орсон юм шиг байна лээ. Тэр хойгуур нь Булган аймгийн ИТХ-ын дарга Д.Эрдэнэбат “Энэ Э.Энхбат их томорчихсон байна” гэх мэт турхирсан, өдөөн хатгасан зүйлс хэлсэн шиг байгаа юм. Тэгээд л зодоон эхэлсэн гэсэн" гэж байв.

Харин тухайн үед хэвлэлийнхэн ИТХ-ын дарга Д.Эрдэнэбаттай холбогдож, тодруулахад "Би Н.Түвшинбаярт “Энэ Энхбат томорчихсон байна” гэж хэлээгүй. Н.Түвшинбаяр, Э.Энхбат нар намайг явсны дараа зодолдсон байна лээ. Би зодоон болж байхад нь хамт байгаагүй гэсэн үг. Юунаас болж зодолсон талаар нь ч мэдэхгүй. Надаас болж зодоон болоогүй" гэж байжээ.