Нийслэлийн удирдах ажилтны шуурхай зөвлөгөөн өнөөдрийн хуралдааны үеэр эрүүл мэндийн салбарынханд Хотын дарга талархал илэрхийллээ.
Хотын дарга Д.Сумъяабазар “Улаанбаатар хотын хэмжээнд ажиллаж буй бүх шатны эмнэлгийн байгууллагад ажиллаж буй цагаан нөмрөгт баатруудад баярлаж талархаж байгаагаа илэрхийлье. Цар тахлын хүнд нөхцөлд ачааны хүндийг үүрсэн эмнэлгийн ажилтан, ажиллагсдад талархал илэрхийлж байна” гэв.
Харин Нийслэлийн эрүүл мэндийн газрын дарга Б.Бямбадорж "Ковид-19” цар тахлын халдварыг бууруулахын төлөө хамтдаа зүтгэсэн нэгэн оныг бид үдэж байна. Энэхүү хариуцлагатай үүргийг хамтдаа үүрсэн бүх хүнд баярлаж байгаагаа хэлье. Өнгөрч буй онд хамгийн их ачаалалтай үе нь нийслэлийн хэмжээнд ес, аравдугаар сар байсан.
Харин арваннэгдүгээр сараас өдөрт дунджаар 230 тохиолдол бүртгэгдэж, халдварын тархалт харьцангуй буурсан. Өнгөрсөн долоо хоногт өдөрт дунджаар 200 тохиолдол бүртгэгдсэн байна" хэмээн мэдээллээ.
