Хөдөлмөрийн баатар Н.Түвшинбаярт холбогдох хэргийн урьдчилсан хэлэлцүүлгийн шүүх хуралдаан өнөөдөр 14:00 цагт Хан-Уул дүүргийн Эрүүгийн хэргийн анхан шатны шүүх дээр болно.
Хохирогч Улсын начин Э.Энхбатын өмгөөлөгч О.Санчирбал, ОДаваажаргал, яллагдагчийн өмгөөлөгч Л.Данзанноров нараас гаргасан саналыг хүндэтгэн хэвлэл мэдээллийнхнийг оролцуулахгүй байхаар шүүхээс шийдвэрлэжээ.
Н.Түвшинбаярт прокурорын байгууллагаас Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1-т зааснаар яллах дүгнэлт үйлджээ.
Хуульд зааснаар "Эрүүгийн хуулийн 11.1 Хүний эрүүл мэндэд хүнд хохирол санаатай учруулах
2. Энэ гэмт хэргийг:
2.1. Энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн; энэ гэмт хэргийн улмаас хохирогч нас барсан бол таван жилээс арван хоёр жил хүртэл хугацаагаар хорих ял шийтгэнэ" гэж заасан байдаг.
