"Сайжруулсан түлшний цогц хэрэглээ" аяны хүрээнд нийслэлийн агаарын чанарын мэдээллийг БОАЖЯ, ЦУОШГ, НМХГ, НЭМҮТ, "Таван толгой түлш" ХХК болон бусад холбогдох байгууллагаас хамтарсан мэдээлэл хийлээ. Энэ үеэр иргэд шахмал түлшний хэрэглэсэн шуудайгаа буцаан өгснөөр 300 төгрөг авах боломжтой болсныг мэдээллээ.
Тодруулбал, Тавантолгой түлш компанийн 10 хангамжийн баазаар дамжуулаад сайжруулсан шахмал түлшний нэг шуудайг 300 төгрөгөөр үнэлж авах аж.
Өнгөрсөн долоо хоногт өмнөх оны мөн үетэй харьцуулахад агаарын бохирдлын хэмжээ харьцангуй бага байсан нь цас орсонтой холбоотой гэж тайлбарласан юм.
Мөн хугацаанд нийт есөн айлын 17 хүн угаарын хийн хордлогод өртсөн гэсэн дуудлага иржээ. Үүнд шалгалт явуулахад энгийн монгол зуухны битүүмж алдагдсан, ширэм нь хагарсан байжээ.
