Дуучин, комедиан С.Зоригт өнгөрсөн долоо хоногт машинаа ачуулсандаа бухимдаж, ачилтын компанийн ажилтаныг загнаж буй бичлэгээ олон нийтийн сүлжээнд тавьсан байдаг. Түүний энэ ёс зүйгүй үйлдэлд иргэд дургүйцлээ илэрхийлж ажилтан залуугаас уучлалт гуйхыг шаардсан юм.
Тэгвэл уг асуудалтай холбоотойгоор дуучин С.Зоригт машин ачилтын компанийн ажилтангаас алсан ёсоор уучлалт хүсчээ.
Тэрээр өөрийн цахим хуудаснаа "Өнгөрсөн өдрүүдэд би өөрийн цахим хуудсаараа машин ачилтын компанийн ажилтан залууг бичлэг хийж, бусдад түгээж, буруу ойлголт төрүүлж, онцгүй үйлдэл гаргасандаа уучлал хүсч байна. Хүн бүр завгүй байдаг, мэдсээр байж дүрэм зөрчдөггүй байх гэж би бодож байна. Тэр үед би өлгийтэй нялх хүүхдээ гялс гэртээ оруулчихаад гарах хооронд аччихсан байсан.
Мөн монголын машин ачилтын холбооноос уучлал хүсч байна. Би хувьдаа машин ачилтын систем нь зөв явж байна гэж бодохгүй байна. Жолооч нар бүгд л машиныхаа цонхон дээр утасны дугаараа тавьдаг. Энэ нь уучлаарай машиныг чинь таглачихлаа, залгаарай гэж л утасны дугаараа үлдээдэг байх. Жаахан ч гэсэн зөв систем рүүгээ ороосой. Та бүхэнд таагүй бичлэг хийж стрессдүүлсэн бол уучлаарай" гэсэн юм.
