Харилцаа холбоо, мэдээллийн технологийн газрын дарга Б.Болор-Эрдэнийг "Цахим үндэстэн" арга хэмжээг зохион байгуулсантай холбоотойгоор хуулийн байгууллага шалгаж эхэлсэн гэх мэдээлэл гараад байсан. Гэвч энэ талаар Авлигатай тэмцэх газраас тодруулахад түүнийг "шалгаагүй" гэж мэдэгдсэн юм.
Тэгвэл өнөөдөр Засгийн газрын хэрэг эрхлэх газрын дарга Ц.Нямдорж Б.Болор-Эрдэнэд сануулга өгсөн тухайгаа хэлэв.
Тэрээр "Цахим үндэстэн арга хэмжээг зохион байгуулахдаа олон хүн цуглана гэж тооцоолоогүй. Алдаа маягийн юм гарсан. Цахим үндэстэн арга хэмжээнд олон хүний бөөгнөрөл үүсгэсэн Харилцаа холбоо, мэдээллийн технологийн газрын дарга Б.Болор-Эрдэнэд би анхааруулсан. Дахин ийм алдаа битгий гаргаарай гэж хэлээд гаргасан" гэлээ.
Гэтэл хэдхэн хоногийн өмнө буюу өнгөрсөн сарын 30-ны өдөр Сүхбаатарын талбайд #NoDoubleStandart суулт хийж байсан иргэн Д.Монголхүүг цагдаагийн байгууллагаас ковидын үеийн хуулийг зөрчсөн хэмээн албадан саатуулсан. Саатуулахдаа түүний биед бэртэл учруулсан. Мөн хоёр хоногийн өмнө түүнийг шөнөөр дахин баривчлах ажиллагаа явуулан, хорьсон билээ.
Иргэн Д.Монголхүү "Хүн бүр тэгш эрхтэй байх ёстой, ковидын хууль даргад нэг өөр, иргэнд нэг өөр үйлчилдэг байж болохгүй" гэж байв.
