Харилцаа холбоо, мэдээллийн технологийн газрын дарга Б.Болор-Эрдэнийг "Цахим үндэстэн" арга хэмжээг зохион байгуулсантай холбоотойгоор хуулийн байгууллага шалгаж эхэлсэн гэх мэдээлэл гарсан.
Энэ талаар Авлигатай тэмцэх газраас тодруулахад түүнийг шалгаагүй гэлээ.
Харилцаа холбоо, мэдээллийн технологийн газраас ICT экспог "Digital nation" уриан дор Есдүгээр сарын 17-19-ний өдрүүдэд зохион байгуулсан. Үндэсний соёл амралтын хүрээлэнд болсон тус арга хэмжээг зохион байгуулах зөвшөөрлийг НОК-оос олгоогүй байсан юм.
Одоогоор зөвшөөрөлгүй арга хэмжээг зохион байгуулсан Харилцаа холбоо, мэдээллийн технологийн газрын дарга Б.Болор-Эрдэнийг хэн ч шалгаагүй байна.
Гэтэл хэдхэн хоногийн өмнө Сүхбаатарын талбайд #NoDoubleStandart суулт хийж байсан иргэн Д.Монголхүүг цагдаагийн байгууллагаас ковидын үеийн хуулийг зөрчсөн хэмээн албадан саатуулсан юм.
Иргэн Д.Монголхүү "Хүн бүр тэгш эрхтэй байх ёстой, ковидын хууль даргад нэг өөр, иргэнд нэг өөр үйлчилдэг байж болохгүй" гэж байв.
Дашрамд, Засгийн газрын 2020 оны Долдугаар сарын 22-ны өдрийн хуралдаанаар Харилцаа холбоо, мэдээллийн технологийн газрын даргаар Б.Болор-Эрдэнийг томилсон билээ.
