Мэргэжлийн сүмогийн 69 дэх их аварга Хакүхо М.Даваажаргал өвдөгний бэртлийн улмаас зодог тайлж буй тухай мэдээ өнөө өглөөнөөс Японы хэвлэлүүдэд гарч эхэлсэн. Тэгвэл энэ талаарх мэдээллийг Монгол Улсаас Японд суугаа ЭСЯ-наас МҮОХ-нд ирүүлжээ.

Уг мэдээлэлд “Японы мэргэжлийн сүмо бөхийн аварга Хакүхо М.Даваажаргал 2021 оны Есдүгээр сарын 27-ны өдөр зодог тайлахаар болсон талаар “Эн-Эйч-Кэй” агентлагаас тус өдрийн өглөө 05 цаг 19 минутад мэдээлэв. Хакүхо М.Даваажаргал 2007 онд мэргэжлийн сүмо бөхийн 69 дэх аварга буюу Ёкозүна цол хүртэж, 14 жилийн турш дээд зиндаанд 45 удаа түрүүлэн 1187 даваа авсан юм.

Тэрээр энэ жилийн Нагоя башёд нэг ч уналгүй 15 даваатайгаар түрүүлж, 45 дахь түрүүгээ хүртэн өөрийн тогтоосон дээд амжилтыг шинэчилсэн билээ.

Тус барилдааны дараа Хакүхо М.Даваажаргал “Эн-Эйч-Кэй” агентлагийн сурвалжлагчид “Миний бие хэд хэдэн гэмтлийн улмаас сайнгүй байна. Цаашдынхаа барилдааны талаар бодох зүйлүүд байна” хэмээн ярьж байв” хэмээн бичжээ.

Ийнхүү мэргэжлийн сүмо бөхийн домогт аварга маань тамирчны замналаа өндөрлүүллээ.

Хакүхо М.Даваажаргалдаа ирээдүйн шилдэг сүмочдыг бэлдэх цаашдын замналд нь амжилт хүсье.