Монголын Боксын холбоо Гавьяат тамирчин Э.Цэндбаатартай холбоотой асуудлаар хуралдаж, түүнийг сорил тэмцээнд оруулахаар шийдвэрлэжээ. 

Э.Цэндбаатар, О.Тулга нарын хоорондох сорил тэмцээнийг Олон Улсын боксын холбооны дүрмээр буюу гурван минутын гурван үетэйгээр зохион байгуулах аж. 

Мөн сорил тэмцээнийг Аравдугаар сарын 3-нд зохион байгуулах бөгөөд тухайн үед манай тамирчид Эрдэнэт хотод цугларалтад гарсан байх юм. 

Алдар нийгэмлэгийн тамирчин О.Тулга одоогоор ОХУ-ын Москва хотод Армийн ДАШТ-д оролцож байгаа юм.

ДАШТ-нд оролцох тамирчныг тодруулах сорилго тэмцээнд ялсан О.Тулгын хувьд Боксын холбооноос гаргасан шийдвэрийг дагана гэж байсан бөгөөд ийнхүү дахин сорилтод орохоор боллоо. 

Харин дээрх шийдвэрийн дараа Гавьяат тамирчин Э.Цэндбаатар өөрийн цахим хуудаснаа талархсанаа илэрхийлжээ.

Тэрээр "Намайг дэмжсэн Монголын ард түмэндээ маш их баярлалаа. Ард түмэнд намайг зөвөөр ойлгуулж өгсөн Ч.Лодойсамбуу ахдаа баярлалаа. Намайг алдаагаа засах боломжоор хангаж, итгэл хүлээлгэсэн Монголын Боксын Холбооны шинэ ерөнхийлөгч Х.Нямбаатар болон удирдах зөвлөлийн гишүүддээ маш их баярлалаа гэж хэлээд би улам илүү их хичээж та бүхнийхээ итгэлийг алдахгүй өндөр амжилт үзүүлэн бэлэг барих болно" гэжээ.

Дашрамд, Боксын холбооны удирдах зөвлөлийн гишүүдийн зүгээс Э.Цэндбаатар удаа дараа ёс зүйгүй үйлдэл гаргахад нь өршөөж, найр тавьж байсан учраас арга хэмжээ авсан. Түүнээс цаашдын тэмцээн уралдаанд оролцох бүх эрхийг нь хязгаарласан зүйл байхгүй гэж мэдэгдсэн юм.